Wizara ya Mambo ya Nje ya Uturuki imekataa kwa uthabiti madai kwamba nchi hiyo imeshindwa kuunga mkono taarifa ya pamoja iliyotolewa na Kundi la Hague kufuatia mkutano wake nchini Colombia Julai 15-16, ikiyaita madai hayo "hayana msingi" na ni sehemu ya kampeni ya upotoshaji.
Katika taarifa iliyotolewa Jumamosi, wizara hiyo ilifafanua kuwa ushiriki katika matamko ya pamoja yaliyotolewa katika mikusanyiko ya kimataifa hufuata utaratibu na muda uliowekwa.
"Kama vile mtu yeyote aliye na uzoefu na ujuzi katika masuala kama hayo angejua, ushiriki katika maamuzi na taarifa za pamoja zinazopitishwa katika mikutano ya kimataifa kwa kawaida hufuata muda uliowekwa," ilisema taarifa hiyo.
Kulingana na wizara hiyo, makataa ya mwisho kwa nchi kuidhinisha rasmi taarifa ya pamoja iliyotolewa katika mkutano wa Bogota ni Septemba 20. Hadi sasa, ni nchi 12 tu kati ya 30 zinazoshiriki zimetangaza kuunga mkono.
Kuendelea kuunga mkono haki za Wapalestina
Uturuki alisisitiza kuwa baadhi ya vipengele vya taarifa hiyo vinahitaji uratibu baina ya taasisi kutokana na wajibu wa kisheria wa kimataifa wa nchi.
"Taasisi na mashirika yote yanayohusika lazima yakamilishe maandalizi muhimu kabla ya kushiriki katika taarifa ya pamoja," wizara ilisema, ikisisitiza kwamba kufuata taratibu hakumaanishi kusitasita kisiasa.
Taarifa hiyo pia ilisema kuwa Uturuki tayari inatekeleza karibu hatua zote zilizoainishwa katika rasimu ya tamko hilo.
"Kama ilivyofanya mara kwa mara hapo awali, Uturuki itaendelea kuunga mkono kwa dhati mipango yote inayolinda haki za Wapalestina," wizara ilisisitiza.
Wizara ya Mambo ya Nje ilionya dhidi ya kutafsiri sera ya Uturuki ya Gaza kupitia kile ilichoelezea kama "mawazo yaliyotokana na habari potofu au nia mbaya."
