İsrail 2023-cü il oktyabrın 7-dən bəri Qəzza zolağının ümumi ərazisinin 88 faizini məhv edib və təxminən iki milyon fələstinlini məcburi köçkün vəziyyətinə salıb. Bu barədə Qəzzadakı Media Ofisinin yayımladığı hesabatda bildirilir.

Hesabata əsasən, İsrail Qəzzaya 125 min ton partlayıcı atıb və bunun nəticəsində bölgəyə 62 milyard dollardan artıq maddi ziyan dəyib. Həmçinin bu dağıdıcı müharibə 2 milyon dinc sakinin məcburi təxliyəsinə və Qəzza zolağının 360 kvadrat kilometr ərazisinin 77 faizinin işğalına səbəb olub.

Öldürülən və ya itkin düşən fələstinlilərin ümumi sayının 67 880 nəfər olduğu qeyd olunur. Onların arasında 19 mindən çox uşaq, 12 500 qadın, o cümlədən 8 150 ana və 953 körpə var.

Qəzzadakı Səhiyyə Nazirliyi xəstəxanalara gətirilən cəsədlərin sayını 58 667 nəfər olaraq açıqlayıb. Təxminən 9 500 fələstinlinin hələ də dağıntılar altında qaldığı və talelərinin naməlum olduğu bildirilir.

Media Ofisinin məlumatına görə, İsrail qüvvələri 1 590 səhiyyə işçisini, 228 jurnalisti və 777 humanitar işçini qətlə yetirib. Bundan əlavə, 2 613 fələstinli ailə tamamilə mülki reyestrdən silinib, azı 68 uşaq aclıqdan, 17 uşaq isə soyuqdan həyatını itirib.

İsrail qüvvələri həmçinin qəbiristanlıqlardan 2 420 cəsədin oğurlanmasında və xəstəxanalarda 7 kütləvi məzarlıq yaratmaqda ittiham olunur. Hesabatda həmçinin qeyd olunur ki, Qəzzadan 6 633 mülki şəxs, o cümlədən 362 səhiyyə işçisi, 48 jurnalist və 26 mülki müdafiə əməkdaşı saxlanılıb.

İsrail 38 xəstəxananı, 96 ilkin səhiyyə mərkəzini məhv edib, 144 təcili tibbi yardım maşınını hədəf alıb. 156 məktəb tamamilə, 382 məktəb isə qismən dağıdılıb.

Ümumilikdə 288 000 ailə evsiz qalıb, 223 000 yaşayış evi tamamilə dağıdılıb, 130 000 mənzil isə yaşanılmaz hala düşüb. 261 sığınacaq mərkəzinin də hədəf alındığı bildirilir.

İsrailin yardım paylama məntəqələrinə hücumları nəticəsində 877 mülki şəxs həyatını itirib, 5 666 nəfər yaralanıb. 139 gün ərzində on minlərlə yardım maşınının bölgəyə girişinə maneə yaradılıb.

Qəzzanın kənd təsərrüfatı sektoru da ciddi ziyan görüb. Su, elektrik, kanalizasiya və arxeoloji obyektlər kimi əsas infrastruktur da demək olar ki, tamamilə məhv edilib.

Beynəlxalq atəşkəs çağırışlarını rədd edən İsrail ordusu 7 oktyabrdan bəri Qəzzaya qarşı vəhşicəsinə hücumlarını davam etdirir. Bu müddətdə öldürülənlərin əksəriyyətini qadın və uşaqlar təşkil edir. Davamlı bombardman bölgəni xarabalığa çevirib, ərzaq qıtlığı və yoluxucu xəstəliklərin yayılmasına səbəb olub.

2023-cü ilin noyabrında Beynəlxalq Cinayət Məhkəməsi İsrailin Baş naziri Benyamin Netanyahu və keçmiş müdafiə naziri Yoav Qallant barəsində Qəzzada hərbi və insanlığa qarşı cinayətlər törətdiklərinə görə həbs orderi verib. İsrail hazırda Qəzzada apardığı müharibəyə görə Beynəlxalq Ədalət Məhkəməsində soyqırımla bağlı iş üzrə də mühakimə olunmaqdadır.