Türkiyə Suriyanın ərazi bütövlüyü, birliyi və suverenliyinə verdiyi dəstəyi bir daha bəyan edib və müharibədən dağılan ölkədə sabitliyin bərpasına töhfə verməyə hazır olduğunu bildirib.

Diplomatik mənbələrin verdiyi məlumata görə, Türkiyənin xarici işlər naziri Hakan Fidan cümə günü suriyalı həmkarı Əsəd əş-Şeybani ilə telefon danışığı aparıb. Tərəflər Suriyanın cənubunda baş verən son hadisələri müzakirə ediblər.

Hakan Fidan söhbət zamanı Türkiyənin bölgədəki vəziyyəti diqqətlə izlədiyini vurğulayıb və Ankaranın Suriyanın ərazi bütövlüyünə, birliyinə və suverenliyinə sadiq olduğunu bir daha ifadə edib.

Nazir həmçinin İsrailin hadisələrə müdaxiləsini qəbuledilməz adlandıraraq, Baş nazir Benyamin Netanyahunun rəhbərlik etdiyi hökumətin həm regional sabitliyi, həm də Suriya xalqının gələcəyini təhdid edən siyasətinə dərhal son qoymalı olduğunu bildirib.

Hazırda Süveyda əyalətinin qərb və şimal bölgələrində bədəvi qəbilə qüvvələri ilə yerli silahlı dürzilər arasında toqquşmalar davam edir.

İsrail isə dürzi icmasını qorumaq bəhanəsi ilə Suriyanın müxtəlif bölgələrinə hava hücumlarını artırıb. İyulun 16-da İsrailə məxsus hərbi təyyarələr Dəməşqdəki Baş Qərargah binası və Prezident İqamətgahı da daxil olmaqla dörd əyalətə zərbələr endirib.