Presidenti Donald Trump ka njoftuar se Coca-Cola do të kalojë nga përdorimi i shurupit të misrit me fruktozë të lartë në sheqer kallami për pijet e prodhuara në SHBA.

“Kam folur me Coca-Cola për përdorimin e sheqerit të VËRTETË të kallamit në Coca-Cola në Shtetet e Bashkuara, dhe ata kanë rënë dakord ta bëjnë këtë,” shkroi Trump në platformën e tij Truth Social.

“Thjesht është më i mirë!”

Presidenti nuk shpjegoi se çfarë e shtyu të ndërhynte në këtë çështje: një ndryshim që nuk ndikon në pijen e tij të preferuar, Diet Coke. Që kur është kthyer në zyrë, Trump raportohet se ka rikthyer butonin në Zyrën Ovale që përdoret për të thirrur pijen pa sheqer.

Coca-Cola nuk e konfirmoi ndërrimin e përbërësit, por dha një përgjigje të shkurtër: “E vlerësojmë entuziazmin e Presidentit Trump për markën tonë ikonike Coca-Cola. Së shpejti do të ndajmë më shumë detaje për oferta të reja dhe inovative brenda gamës sonë të produkteve Coca-Cola.”

Diet Coke, e preferuara e Trumpit, ëmbëlsohet me aspartam, një substancë që së fundmi është klasifikuar si “kancerogjen i mundshëm” nga agjencia e kërkimeve për kancerin e Organizatës Botërore të Shëndetësisë.

Një ndryshim i mundshëm në përbërje mund të shkaktojë tensione politike në rajonin e Mesperëndimit të ShBA-së, ku misri është një kulturë bujqësore kryesore dhe ku Trump gëzon mbështetje të fortë.