Албанската Влада ја забрани кинеската апликација за социјално вмрежување ТикТок на национално ниво на една година, известува Анадолу.

Албанската министерка за национално образование и спорт, Огерта Манастирлиу, по состанокот на Советот на министри даде изјава за медиумите за ова прашање.

Манастирлиу истакна дека за апликацијата ТикТок, која предизвикува дискусии од ноември 2024 година, е прифатена одлуката за привремена забрана во период од една година низ целата земја.

Министерката Манастирлиу информираше дека одлуката е донесена по разговори со 65.000 родители во земјата.

Во меѓувреме, албанското Министерство за национално образование и спорт објави соопштение во кое најавува дека забраната за пристап ќе започне во рок од неколку дена и ќе може да продолжи сѐ додека платформата не ги имплементира безбедносните и старосните стандарди за малолетните корисници.

Мартин Цани, 14-годишен ученик во Основното училиште „Фан Ноли“ во Тирана, главниот град на Албанија, го загуби животот по напад со нож извршен од друг ученик на 18 ноември 2024 година.

Се тврдеше дека расправијата меѓу учениците започнала на социјалните мрежи.

Албанскиот премиер Еди Рама по инцидентот изјави дека ќе одлучат да го забранат ТикТок во земјата на период од 1 година и дека оваа одлука ќе биде донесена во 2025 година.