Американскиот претседател Доналд Трамп ја засили својата жестока реторика против имиграцијата, тврдејќи дека во Соединетите Американски Држави (САД) има „инвазија“ од 21 милион недокументирани мигранти и предупреди дека земјата ризикува да стане земја од третиот свет преполна со криминал“ доколку не се спроведат масовни депортации.

„Во нашата земја има инвазија од 21.000.000 илегални странци, од кои многумина се убијци и криминалци од највисок ред“, напиша Трамп на својата платформа „Трут соушал“.

„Ако не ни е дозволено да ги отстраниме поради радикализираниот и неспособен судски систем, САД брзо и насилно ќе станат земја од третиот свет преполна со криминал, и никогаш повеќе нема да ја видат својата величина.“

Трамп исто така ги повика своите правници да ја изнесат оваа теза пред Врховниот суд на САД:

„Нашите адвокати треба да го наведат овој факт кога ќе се појават пред Врховниот суд на САД и сите други судови.“

„Јас победив со огромно мнозинство, ги освоив сите седум клучни држави, 312 електорски гласови, победив во 2750 окрузи наспроти 525, и лесно победив на гласањето на народот. Мора да ми биде дозволено да ја вршам работата за која сум избран. Во спротивно, нема да имаме држава“, додаде тој.

– „Судовите се во војна“ - Изјавите на Трамп доаѓаат по неколку дена откако неговиот висок советник, Стивен Милер, изјави дека кампањата размислува за суспендирање на habeas corpus — основно уставно право против произволно притворање — за да се забрзаат депортациите.

„Уставот е јасен... правото на habeas corpus може да се суспендира во време на инвазија“, рече Милер во петокот во изјавата за новинарите во Белата куќа.

„Тоа е опција што активно ја разгледуваме. Многу зависи од тоа дали судовите ќе постапат како што треба.“

Habeas corpus, заштитен со член I, секција 9 од Уставот на САД, гарантира дека притворените имаат право да ја оспорат законитоста на нивниот притвор пред суд. Тоа право не смее да се суспендира „освен во случаи на бунт или инвазија кога јавната безбедност го бара тоа“.

И Трамп и Милер го користат терминот „инвазија“ за да го оправдаат заобиколувањето на законската процедура во третманот на мигрантите, без разлика дали се без документи или со виза.

„Судовите не се само во војна со извршната власт. Овие радикални, отуѓени судии се и во војна со законодавната гранка“, додаде Милер.

Администрацијата на Трамп доживеа неколку правни порази во обидите за депортација на мигрантите, вклучително и на меѓународните студенти како Румејса Озтурк и Махмуд Халил, кои успешно го искористија habeas corpus за да ги поништат наредбите за депортација поради нивните претходни пропалестински изјави.

Нема независна потврда за бројката од 21 милион недокументирани мигранти што ја наведува Трамп. Повеќето проценки ја поставуваат бројката меѓу 10 и 11 милиони.