Չինաստանը և Կոլումբիան ստորագրել են համագործակցության համատեղ ծրագիր «Գոտի և ճանապարհ» նախաձեռնության շրջանակներում՝ Պեկինում իրենց առաջնորդների հանդիպումից հետո: Չորեքշաբթի օրը լուրը հայտնել են պետական լրատվամիջոցները։
Վերջին տարիներին աճող առևտրային հարաբերությունները մեծացրել են Պեկինի ազդեցությունը Լատինական Ամերիկայում և Կարիբյան ավազանում: Այս տարածաշրջանը ռազմավարական նշանակություն ունի ԱՄՆ-ի համար։
Չինաստանը Կոլումբիայի երկրորդ խոշոր առևտրային գործընկերն է ԱՄՆ-ից հետո։ Այն նաև վերջերս փոխարինեց ԱՄՆ-ին՝ որպես Կոլումբիայի ներմուծման ամենամեծ աղբյուրը:
Չինաստանի նախագահ Սի Ցզինպինը Կոլումբիայի նախագահ Գուստավո Պետրոյին ասել է, որ իր երկիրը պատրաստ է ավելի շատ բարձրորակ ապրանքներ ներմուծել Կոլումբիայից, աջակցել չինական ընկերություններին ներդրումներ կատարել և բիզնես հիմնել Կոլումբիայում և համագործակցել ենթակառուցվածքային նախագծերում, հաղորդում է Սինհուա պետական լրատվական գործակալությունը:
«9,2 միլիարդ դոլարի վարկ»
Կոլումբիայի արտաքին գործերի նախարարությունը ողջունել է չորեքշաբթի Չինաստանի հետ «պատմական» համաձայնագիրը։
«Կոլումբիան և Չինաստանն այսօր ստորագրեցին «Գոտի և ճանապարհ» նախաձեռնության համագործակցության պլանը», - ասվում է նախարարության հայտարարության մեջ, որը նկարագրում է քայլը որպես «պատմական զարգացում, որը նոր հնարավորություններ է բացում երկու երկրների համար ներդրումների, տեխնոլոգիական համագործակցության և կայուն զարգացման համար»:
Համաձայնությունը ձեռք է բերվել Պեկինում Լատինական Ամերիկայի առաջնորդների հանդիպման շրջանակում։ Այս հանդիպման ժամանակ Չինաստանի նախագահ Սի Ցզինպինը խոստացել է 9,2 միլիարդ դոլարի վարկ տրամադրել «զարգացման» նպատակով։
«Մեր արտաքին հարաբերությունների պատմությունը փոխվում է», - ասել է Կոլումբիայի նախագահ Գուստավո Պետրոն «X» հարթակում արված հայտարարության մեջ: «Կոլումբիան այսուհետ հարաբերություններ կհաստատի աշխարհի հետ՝ հիմնված հավասարության և ազատության վրա»։
Երկուշաբթի Պետրոն հայտարարեց, որ Կոլումբիան կմիանա «Գոտի և ճանապարհ» նախաձեռնությանը, որը մեկնարկել է Չինաստանի նախագահ Սիի կողմից 2013 թվականին և նպատակ ունի վերակենդանացնել հնագույն Մետաքսի ճանապարհը և ամրապնդել Չինաստանի համաշխարհային առևտրային և ենթակառուցվածքային կապերը:
Լատինական Ամերիկայի ավելի քան 20 երկիր ներգրավված է այս ծրագրում, որն ընդգրկում է աշխարհի ավելի քան 150 երկիր։ Սակայն Պանաման որոշեց դուրս գալ ծրագրից փետրվարին։ Չինաստանն այս որոշումը վերագրել է ԱՄՆ-ի ճնշմանը։
Պետրոն, որը պաշտոնը ստանձնեց 2022 թվականի օգոստոսին, իր առաջին այցը Չինաստան կատարեց որպես նախագահ 2023 թվականի հոկտեմբերին, և 1980 թվականին հաստատված երկկողմ հարաբերությունները բարձրացվեցին ռազմավարական գործընկերության մակարդակի։
