Չինաստանը, Պակիստանը և Աֆղանստանը չորեքշաբթի օրը համաձայնության են եկել Չինաստան-Պակիստան տնտեսական միջանցքի նախագիծը Աֆղանստան ընդլայնելու վերաբերյալ, ասվում է Պակիստանի արտաքին գործերի նախարարության պաշտոնական հայտարարության մեջ։
Համաձայնությունը ձեռք է բերվել Պեկինում Չինաստանի արտաքին գործերի նախարար Վան Իի կազմակերպած եռակողմ արտգործնախարարների հանդիպման ժամանակ։ Հանդիպմանը մասնակցել են նաև Պակիստանի արտաքին գործերի նախարար Իսհակ Դարը և Աֆղանստանի ժամանակավոր արտաքին գործերի նախարար Ամիր Խան Մութթաքին։
«Կողմերը համաձայնության են եկել խորացնել համագործակցությունը «Մեկ գոտի, մեկ ճանապարհ» նախաձեռնության շրջանակներում և ընդլայնել Չինաստան-Պակիստան տնտեսական միջանցքը մինչև Աֆղանստան», - ասվում է նախարարության հայտարարության մեջ։
Առանձին հայտարարության մեջ Պեկինը նշել է, որ երեք երկրները կխորացնեն համագործակցությունը «Մեկ գոտի, մեկ ճանապարհ» նախաձեռնության համատեղ կառուցման գործում, կնպաստեն Չինաստան-Պակիստան տնտեսական միջանցքի Աֆղանստան ընդլայնմանը և կամրապնդեն տարածաշրջանային կապի ցանցերի կառուցումը։
64 միլիարդ դոլար արժողությամբ նախագիծը «Մեկ գոտի, մեկ ճանապարհ» նախաձեռնության առաջատար բաղադրիչներից է։ Նախագիծը Չինաստանի հյուսիսարևմտյան Սինցզյան շրջանը կապում է Պակիստանի Բելուջիստան նահանգի Գվադար նավահանգստի հետ՝ ապահովելով բեռների, նավթի և գազի փոխադրում ճանապարհների, երկաթուղու և խողովակաշարերի ցանցի միջոցով։
«Մեկ գոտի, մեկ ճանապարհ» նախաձեռնությունը Չինաստանի գլոբալ ենթակառուցվածքային խթանն է, որի նպատակն է մեծացնել Չինաստանի և գործընկեր երկրների միջև տնտեսական կապը։
Նշվեց, որ հանդիպման ընթացքում արտաքին գործերի նախարարները քննարկել են դիվանագիտական փոխգործակցությունը ամրապնդելու, հաղորդակցությունը բարելավելու և առևտրի, ենթակառուցվածքների և զարգացման ավելացման ուղղությամբ կոնկրետ քայլեր ձեռնարկելու ուղիները։
Նրանք նաև ընդգծել են իրենց համատեղ հանձնառությունը՝ պայքարելու ահաբեկչության դեմ և խթանելու տարածաշրջանային կայունությունն ու բարգավաճումը։
