Иран Сыртқы істер министрі өткен ай Үндістанның бақылауындағы Кашмирде болған қанды шабуылдан кейін Исламабад пен Жаңа Дели арасындағы шиеленісті шешу үшін дүйсенбі күні Пәкістанға барды.

Пәкістан Сыртқы істер министрлігі Аббас Аракчидің даулы Кашмир аймағында туристерге жасалған шабуылдан кейін, шиеленіс ушығып тұрған кезеңде шетелдік шенеуніктің елге жасаған алғашқы сапары екенін мәлімдеді.

Бұл сапар Тегеран екі ел арасындағы шиеленісті бәсеңдетуге көмектесуді ұсынғаннан кейін бірнеше күн өткен соң жасалды.

Аракчиді Пәкістанның жоғары лауазымды тұлғалары қарсы алды. Министрліктің мәлімдемесіне қарағанда Аракчи Пәкістан Сыртқы істер министрі Исхак Дар, президент Асиф Али Зардари және премьер-министр Шахбаз Шарифпен кездеседі. Мәлімдемеде басқа мәлімет берілмеді.

Пәкістанның Қарулы күштері өткен аптадан бері жоғары дайындық режиміне көшті. Бұл жағдай Үндістан Пәкістанға шабуыл жасауы мүмкін деген министр Аттаулла Тарардың сенімді ақпаратынан кейін басталды.

Пәкістан бұл шабуылға қатысы жоқ екенін айтып, халықаралық тергеу жүргізуді ұсынды.

Жаңа Дели осы уақытқа дейін бұл ұсынысты қабылдамады және көптеген әлемдік көшбасшы, соның ішінде АҚШ шенеуніктері екі тарапты сабырлы болуға және одан әрі шиеленісті болдырмауға шақырды.

Кашмир Үндістан мен Пәкістан арасында екіге бөлінді. Екі ел де аймақ бойынша өз құқықтарын талап етуде. Осы уақытқа дейін екі ел арасында болған үш соғыстың екеуі Гималай аймағына қатысты болды. Қарым-қатынастары бұрыннан-ақ қақтығыста және өзара сенімсіздікте болатын. Бұл жағдай негізінен Кашмирдегі бәсекелестікке байланысты еді.

Соңғы шиеленістен кейін екі ел дипломаттары мен азаматтарын өзара елден шығарып, әуе кеңістігін жауып тастады.