Пакистан коопсуздук күчтөрү өлкөнүн түндүк-батышында жүргүзүлгөн атайын операция учурунда кеминде тогуз согушкерди жок кылышты. Операция Хайбер-Пахтунхва провинциясында башталган кенен коопсуздук операциянын бир бөлүгү катары ишке ашырылды.

Кагылышуу ишемби күнү Хангу районунун Доаба аймагында полиция жана коопсуздук күчтөрү биргелешип жүргүзгөн операция учурунда болду.

Билдирүүдө : “Ушул кезге чейин тогуз согушкер жок кылынды жана аймакта операция азыр да уланууда",- деп айтылды.

Операция учурунда үч коопсуздук кызматкери жаракат алды, алардын арасында Хангу районунун полиция башчысы Халид Хан да бар. Жаракат алгандар Кохат шаарындагы ооруканага жеткирилип, алардын абалынын туруктуу экендиги маалымдалды.

Башка бир окуяда полиция Хайбер-Пахтунхвадагы Банну районунда жардыргыч заттар жүктөлгөн эки квадрокоптерди атып түшүрүштү. Жетекчилердин айтымында, бул дрондор Терроризмге каршы күрөшүү департаментинин полиция бекетин жана Мирян полиция бекетин бутага алууну көздөшкөн.

Зомбулук окуялары

Акыркы зомбулук окуялары ушул жумада болгон бир катар кандуу окуялардан кийин болду.

Шаршемби күнү Хайбер-Пахтунхва жана Белужистан провинцияларында болгон чабуулдар жана коопсуздук операциялар учурунда 10 адам, анын ичинде эки полиция кызматкери, бир аскер офицери жана төрт согушкер каза тапкан.

Буга чейин ушул айдын башында, Пакистан күчтөрү Афганистандан Түндүк Вазиристанга өтүүгө аракет кылган 30 согушкерди жок кылгандарын билдиришкен.

Исламабад башкаруусу Техрик-е-Талибан Пакистан (ТТП) террордук уюмун Афганистандын аймагынан чек ара аркылуу чабуул жасоо менен бир нече жолу айыптаган, бирок бул дооматты Кабул четке каккан.