امریکايي چارواکیو ویلي دي چې ټرمپ د ایران د دیني مشر د وژلو د پلان مخنیوی وکړ.
د امریکا ولسمشر ډونالډ ټرمپ د اسرائیلو هغه پلان مخه ونیوله چې د ایران ستر مذهبي مشر آیت الله علي خامنه اي د ترور کولو لپاره جوړ شوی و، دا خبره یوه لوړپوړي امریکایي چارواکي فرانس پریس خبري اژانس ته وکړه.
دغه امریکایي چارواکي د یکشنبې په ورځ د نوم نه ښودلو په شرط وویل: "موږ پوه شو چې اسرائیلو د ایران ستر مذهبي مشر د هدف ګرځولو پلان درلود. ولسمشر ټرمپ د دې مخالفت وکړ او موږ اسرائیلو ته وویل چې دا کار ونه کړي."
له دې وړاندې، د اسرائیلو لومړي وزیر بنیامین نتنیاهو د دې پوښتنې په ځواب کې چې ایا ټرمپ له اسرائیلو غوښتي چې خامنه اي ونه وژني، له ځواب ورکولو ډډه وکړه.
هغه د فاکس نیوز سره په خبرو کې وویل: "زه په دې اړه څه نه وایم، خو زه تاسو ته ویلای شم چې موږ هغه څه کوو چې زموږ لپاره اړین دي، او زه فکر کوم چې امریکا پوهیږي چې د دوی لپاره څه ښه دي."
دا څرګندونې په داسې حال کې وشوې چې د یکشنبې په ورځ اسرائیل او ایران یو بل باندې د توغندیو بریدونه وکړل. خلکو ته ویل شوي و چې پناه ځایونو ته لاړ شي، ځکه چې د بیت المقدس په شاوخوا کې د چاودنو غږونه اورېدل کېدل، او راپورونه ورکړل شول چې په تهران کې د هوايي دفاع سیستمونه فعال شوي دي.
د کلونو دښمنۍ او د نیابتي جګړو او پټو عملیاتو وروسته، دا وروستۍ جګړه لومړی ځل و چې دواړو هېوادونو په دومره شدت سره یو بل سره مخامخ بریدونه پیل کړي دي. دې حالت د اوږدې جګړې وېره رامنځته کړه چې کېدای شي ټول منځني ختیځ ته خپره شي.
دا جګړه د جمعې په ورځ هغه وخت پیل شوه چې اسرائیلو پر ایران برید وکړ او د دې هېواد لوړپوړي پوځي قوماندانان او اټومي ساینسپوهان یې ووژل. دغه راز یې پوځي هډې، اټومي ځایونه او د استوګنې سیمې په نښه کړل.
د تل ابیب بې دلیله برید جګړه پیل کړه، چې ایران یې په ځواب کې پر اسرائیلو بریدونه وکړل. له هغه وخت راهیسې متقابل بریدونه دوام لري.
نتنیاهو د فاکس نیوز سره په خبرو کې په کلکه اشاره وکړه چې اسرائیلو د ایران د استخباراتو مشر محمد کاظمي وژلی دی، او ویې ویل چې دوی په تهران کې د استخباراتو مشر او د هغه مرستیال په نښه کړي دي.
ولسمشر ټرمپ ټینګار کړی چې واشنګټن، چې د اسرائیلو قوي متحد دی، د اسرائیلو د بمبارۍ په کمپاین کې هیڅ لاس نه لري. هغه د یکشنبې په ورځ د ABC نیوز سره په خبرو کې وویل چې امریکا "په دې وخت کې" په پوځي عملیاتو کې ښکېل نه دي.
هغه دا هم وویل چې دی چمتو دی چې خپل روسي سیال ولادیمیر پوتین د دې شخړې د حل لپاره منځګړی وټاکي.
