Siriýanyň bitewiligine, jebisligine we özygtyýarlygyna goldaw berýändigini nygtan Türkiýe, söweş sebäpli uly ýitgi çeken ýurtda durnuklylygyň ýola goýulmagyna goşan goşmaga taýardygyny mälim etdi.

Diplomatik töwerekleriň berýän maglumatyna görä, Daşary işler ministri Hakan Fidan, anna güni siriýaly kärdeşi Asaad Al Şaibani bilen geçiren telefon söhbetdeşliginde ýurduň günortasynda başdan geçirilýän soňky wakalar hakynda pikir alyşdy.

Hakan Fidan telefon söhbetdeşliginde Türkiýäniň sebitde başdan geçirilýän soňky wakalar bilen ýakyndan gyzyklanýandygyny we Ankaranyň Siriýanyň territorial bitewiligine, durnuklylygyna we özygtyýarlygyna goldaw berýändigini ýene-de bir gezek nygtady.

Ysraýylyň wakalara goşulyşmagynyň kabul edilmesizdigini aýdan Fidan, Ysraýylyň Premýer-ministri Binýamin Netanýahunyň hökümetiniň sebitiň durnuklylygy we siriýanyň halkynyň gelejegi taýdan howly bolan hereketlerinden ýüz öwürmelidigini belledi.

Süweýda welaýatynyň günbatarynda we demirgazygynda Bedewi taýpalar bilen ýerli ýaragly Dürzi toparlaryň arasyndaky çaknyşyklar dowam edýär.

Ýekşenbe güni başlan çäkli çaknyşyklar, Siriýanyň harby goşunynyň sebite gelmegi bilen has-da güýçlendi.

Ýaragly Dürzi toparlar tarapyndan guralan hüjümlerde onlarça esger ýogaldy.

Siriýanyň howpsuzlyk güýçleri bilen Dürzi toparlaryň arasyndaky dartgynlygyň möwjemeginden soň gysga wagtlygyna ylalaşyk gazanyldy.

Ysraýyl Dürzü toparlary goramak bahanasy bilen Siriýa hüjüm gurady. Çarşenbe güni Damaskda Baş ştabyň başlyklygy bilen Prezidentiň köşgüne we 4 welaýata howa hüjümi guraldy.

Penşenbe güni Arap ýurtlarynyň we Amerikanyň töwellaçylyk etmeginde täze ylalaşyk gazanylandygy habar berildi. Ylalaşygyň çäginde hökümete tabynlykdaky esgerler dartgynlygyň gowşamagy maksady bilen Süweýdadan çekilmäge başlady.