АҚШ президенті Дональд Трамп Вашингтонның Сирия бойынша жаңадан сайланған арнайы өкілі ондаған жылға созылған Асад билігі күйрегеннен кейін бірлесіп жұмыс істеудің үлкен әлеуетін байқағанын айтты.

Трамп сәрсенбі күні әлеуметтік желі парақшасында «Америка Құрама Штаттарының Түркиядағы елшісі Том Барактың Сирия бойынша арнайы өкіліміз ретінде қызмет атқаратынын хабарлауға қуаныштымын», - деп жазды.

"Том радикализмді тоқтату, қарым-қатынастарды жақсарту және Таяу Шығыста бейбітшілікке қол жеткізу үшін Сириямен жұмыс істеудің үлкен әлеуетін біледі. Біз Америка мен әлемді ҚАЙТАДАН ҚАУІПСІЗ етеміз!",- деп қосты ол.

Бұл мәлімдеме Трамптың “қатыгез” деп сипаттаған Асад билігі кезінде Сирияға салынған санкцияларды алып тастағаннан бірнеше күн өткен соң жасалды. Трамп бұл шешімнің президент Режеп Тайып Ердоған мен Сауд Арабиясының тақ мұрагері Мұхаммед бин Салманның талаптарынан кейін қабылданғанын айтты.

АҚШ президенті өткен ай Сауд Арабиясына сапары кезінде Сирия президенті Ахмед әл-Шарамен Эр-Риядта кездесті. Бұл тарихи кездесу АҚШ пен Сирия көшбасшыларының 25 жылдан кейінгі алғашқы кездесуі болды. Соңғы рет 2000 жылы Женевада бұрынғы президент Билл Клинтон Хафез Асадпен кездескен болатын.

АҚШ Мемлекеттік хатшысы Марко Рубио өткен апта заң шығарушыларға Вашингтонның Сирияның жаңа үкіметіне көмек көрсету талпыныстарын қолдайтынын атап өтіп, “Сәтсіздік қайта жанжал мен аймақтық тұрақсыздыққа әкеледі” деп ескертті.