Біріккен Ұлттар Ұйымының Қауіпсіздік Кеңесі сәрсенбі күні Газа секторында “барлық тарап орындайтын дереу, сөзсіз және тұрақты бітім” талап ететін қарар жобасы бойынша дауыс беруге дайындалып жатыр.

БҰҰ дипломаттарының айтуынша, Америка Құрама Штаттары бұл қарарға вето қоюы мүмкін.

Газа секторындағы гуманитарлық жағдайды “апатты” деп сипаттаған бұл қарар сондай-ақ “Газаға гуманитарлық көмектің жеткізілуіне қойылған барлық шектеулердің дереу және сөзсіз алынып тасталуын және бұл көмектің БҰҰ мен гуманитарлық серіктестер тарапынан қауіпсіз әрі еш кедергісіз кең ауқымда таратылуын” талап етеді.

Сәрсенбі күні түстен кейін кеш уақытта өткізілуі жоспарланған бұл дауыс беру процесі АҚШ қолдайтын даулы гуманитарлық орталықта көмекке мұқтаж палестиналықтардың күн сайын Израиль шабуылдарынан қаза тауып жатқан тұста өтпек.

Біріккен Ұлттар Ұйымы бұл жаңа жүйені қабылдамайтынын мәлімдеп, оның Газа секторындағы күшейіп бара жатқан аштық дағдарысын шеше алмайтынын, керісінше Израильге гуманитарлық көмекті қару ретінде пайдалануға мүмкіндік беретінін және бейтараптық, әділеттілік пен тәуелсіздік сияқты гуманитарлық қағидаттарға сай келмейтінін атап көрсетті.

Қарар жобасы дәл осы қағидаттар, халықаралық гуманитарлық құқық пен БҰҰ Қауіпсіздік Кеңесінің шешімдеріне сәйкес гуманитарлық қызметтің барлығының қайта жандандырылуын талап етеді.

АҚШ вето қоя ма?

Сейсенбі күні аты-жөні аталмауын сұраған бірнеше БҰҰ дипломаты АҚШ-тың бұл қарар жобасына вето қоятынын күтетіндерін айтты.

Дипломаттардың мәліметінше, қарарды ұсынатын Қауіпсіздік Кеңесінің 10 сайланған мүшесі америкалық тараппен келіссөз жүргізуге тырысқанымен, бұл әрекеттер нәтиже бермеген.

АҚШ-тың Біріккен Ұлттар Ұйымындағы миссиясы әзірге бұл жобаға қатысты ешқандай пікір білдірген жоқ.