Канаданың Торонто қаласындағы кітапханада мұсылман әйелге шабуыл жасалып, орамалын өртеп жібермек болған күдікті ұсталды.

Дарем аймақтық полициясы мәлімдемесінде «Жәбірленуші кітапханада отырған кезде оған белгісіз әйел балағат сөздер айтып, басына түрлі зат лақтырған. Кейін күдікті жәбірленушінің орамалын шешпек болып, үстіне белгісіз сұйықтық құйып, орамалын өртеп жібермек болған», – делінген.

Жәбірленушінің  көмек сұраған жанайқайынан кейін кітапхана күзетшілері араша түскен. Полиция күдіктінің оқиға орнынан қашып кеткенін, бірақ бірнеше сағат ішінде ұсталып, қамауға алынғанын айтты.

Канада мұсылмандарының ұлттық кеңесі (NCCM) оқиғаны «жантүршігерлік» деп мәлімдеді.

«Мұндай зорлық-зомбылықтың біздің қоғамда қалыпты жағдайға айналғаны ұят. Соңғы жылдары исламофобиялық шабуылдар күрт өсті», - деді «NCCM» бас директоры Стивен Браун. «Көшбасшыларымызбен жиналып, бұл мәселені шешетін уақыт келді», - деп қосты ол.

Эйджакс әкімі Шон Коллиер мен кітапхана басқармасының төрағасы Пияли Коррея муниципалитеттің веб-сайтында бірлескен мәлімдеме жариялады.

Мәлімдемеде «Бейбітшілік пен рухани байланыс айы Рамазанда болған жан түршігерлік шабуылдың құрбанына және бұл оқиғадан зардап шеккендерге үндеуіміз бар. Сізді қолдау үшін осындамыз және өшпенділік пен төзімсіздіктің кез келген түріне қарсымыз» делінген.   

Браунның айтуынша «NCCM» полициядан оқиғаны жеккөрушілік қылмыс ретінде қарастыруды сұраған.