Ресей президенті Владимир Путин Иран халқының ел басшылығының төңірегінде біріккенін айтып, Израильдің бұрын-соңды болмаған шабуылдарына қарамастан Иранның жерасты уран байыту нысандарының бұзылмағанын атап өтті.

АҚШ «Иранның ядролық және зымыран нысандарына бағытталған Израиль шабуылдарына қатыса ма, жоқ па?» деген мәселе қызу талқыланып жатқан кезде Путин мәлімдеме жасады. Путин «Тараптар Иранның бейбіт мақсаттағы ядролық энергия құқығына және Израильдің қауіпсіздік құқығына кепілдік бере отырып, қақтығыстарды тоқтату жолдарын іздеуі керек», -  деді.

«Израильдің әскери шабуылдары Ирандағы үкіметті құлатуы мүмкін» деген  Нетаньяхудің мәлімдемелері мен АҚШ президенті Дональд Трамптың «Иран шартсыз берілуі керек» деген талабына қатысты сұраққа Путин «Қандай да бір іске кіріспес бұрын, негізгі мақсаттың жүзеге асып, аспауына көз жеткізу қажет» екенін айтты.

«Бүгін Ирандағы барлық күрделі ішкі саяси процестерге қарамастан, біз халықтың үкіметпен бірге  екенін көріп отырмыз», - деді Путин Санкт-Петербургтегі ақпарат агенттігінің аға редакторларына.

Путин Трамп және Нетаньяхумен жеке байланыста болғанын, қақтығысты шешуге қатысты Мәскеудің идеяларын жеткізгенін айтты. Ресей басшысы Иранның жер астындағы уран байыту нысандарының әлі күнге дейін бұзылмағанын атап өтті.

«Иранның жер асты зауыттары бар, оларға ештеңе болған жоқ» деген Путин барлық тараптардың Иранның да, Израильдің де мүдделеріне кепілдік беретін шешім іздеуі керек екенін айтты.

«Тараптардың өзара келісімге келу жолдарын табуы орынды болар еді. Мұндай шешімді табуға болады деп ойлаймын,” – деді Путин.

Иран Ресейден әскери қолдау алғысы келмейді

Сондай-ақ Ресей президенті Иранның Мәскеуден әскери қолдау сұрамағанын мәлімдеді.

Путин «Иран бізден ешқандай әскери көмек сұраған жоқ. Біз бұрын әуе қорғаныс жүйелерін бірлесіп жасауды ұсынған кезде де Иран бұл мәселеге онша қызығушылық танытпады», - деді.

Путин Иранның мүдделерін қамтамасыз ететін және Израильдің алаңдаушылықтарын сейілтетін шешімдердің бар екенін және серіктестерге ұсынылғанын айтты. Сонымен қатар Ресей мен Иранның Бушер атом электр стансасында екі жаңа ядролық блоктың құрылысы туралы келісімге қол қойғанын мәлімдеді.

«Жұмыс жалғасуда, 200-ден астам маманымыз жұмыс істеуде. Біз Израиль үкіметімен олардың қауіпсіздігі қамтамасыз етіледі деп келістік», - деп қосты Путин.

Ресей Сыртқы істер министрінің орынбасары Сергей Рябков сәрсенбі күні жасаған мәлімдемесінде «Мәскеу АҚШ-тан Иранға шабуыл жасамауды сұрады өйткені бұл Таяу Шығысты түбегейлі тұрақсыздандырады», - деді.