Сапар аясында сауда келісімдері, қорғаныс саласындағы ынтымақтастық және аймақтық дипломатия басты назарда болады деп күтілуде.

Сейсенбі күні Трамп Катар мен Біріккен Араб Әмірліктерін қамтитын Парсы шығанағы турын Сауд Арабиясынан бастайды.

Ақ Үй Трамптың бұл сапарын екінші мерзіміндегі алғашқы ірі шетелдік сапаp ретінде сипаттады.

Сегіз жыл бұрын Трамп Президент ретінде алғашқы шетел сапарын дәл осы Сауд Арабиясына жасаған болатын.

Сапар алдында Ақ Үй Үндістан мен Пәкістан арасында атысты тоқтату, Газадағы бір америкалық тұтқынды босату және Иранмен жаңа ядролық келіссөздер бастау жөніндегі дипломатиялық әрекеттерде маңызды рөл атқарды. Бұл бастамалар Трамптың өткен аптада Иран қолдайтын хуситтермен Йеменде атысты тоқтату келісіміне қол жеткізгенін жариялағаннан кейін жүзеге асырылды.

«Келісімдер»

Дегенмен Парсы шығанағына сапардың негізгі бағыты сауда келісімдері болуы мүмкін.

«Atlantic Council» құрамындағы «Scowcroft» Таяу Шығыс Қауіпсіздігі Бастамасының аға сарапшысы Дэниел Б. Шапиро: «Ақ Үй дереккөздері Президенттің келісімдерге басымдық беретінін мәлімдеді», – деп жазды.

Эр-Рияд, Доха және Абу-Даби қалаларында 78 жастағы миллиардерге қызыл кілем төселіп, салтанатты қарсы алу рәсімдері ұйымдастырылуы күтілуде. Ал Трамптың баспасөз хатшысы Каролин Левитт сапар алдында жасаған мәлімдемесінде Президенттің «экстремизмнің орнына сауда мен мәдени өзара ықпалдастық келетін» бір болашақ көрінісін ілгерілету мақсатында «Таяу Шығысқа тарихи сапарын» тағатсыздана күтіп отырғанын айтты.

Парсы шығанағы елдері Трамптың екінші мерзімінде өздерін басты дипломатиялық серіктес ретінде көрсетіп отыр. Мысалы Доха – ХАМАС пен Израиль арасындағы келіссөздерде маңызды делдал рөлін жалғастыруда, ал Сауд Арабиясы  Украинадағы соғысқа қатысты келіссөздерге алаң ұсынған болатын.

Сауд Арабиясын Израильді мойындауға итермелеу бұл сапарда басты мақсаттардың бірі болмайтын сияқты. Эр-Рияд қандай да бір келісім жасалмас бұрын Палестина мемлекеті құрылуы қажет екенін табанды түрде айтып келеді.

Осы арада Иран мәселесі әсіресе апта соңында Оманда өткен төртінші келіссөздер кезеңінен кейін, сапар кезінде маңызды тақырыптардың бірі болады деп жоспарланды.

Президенттің Катар патша әулетінен сыйға уақытша алған люкс «Boeing» ұшағын «Air Force One» ретінде пайдалану жоспарына қатысты дау-дамай жалғасып жатқанда, жексенбі түні Трамп бұл ұшақты уақытша берілген «сыйлық» деп атап, сын-пікірлерге жауап берді.

Бұл келісімді «өте ашық әрі айқын мәміле» деп сипаттаған Трамп дүйсенбі күні Вашингтоннан ұшып кетпестен бұрын: «Мұндай ұсыныстан ешкім бас тартпас еді», – деді.