Катар Мысыр мен басқа да делдалдардың Газа секторында ХАМАС пен Израиль арасындағы атысты тоқтату келіссөздеріне кедергі жасау үшін "қаржылық төлем" жасағаны туралы айыптауларды жоққа шығарды.

Катардың Халықаралық медиа кеңсесі  бейсенбі күні  «Катар мемлекеті кейбір журналистер мен бұқаралық ақпарат құралдары тарапынан Катардың Мысыр немесе ХАМАС пен Израиль арасындағы келіссөздерге қатысқан кез келген делдалдың күш-жігерін бұзу үшін қаржылық төлем жасағаны туралы жарияланған мәлімдемелерді қатаң айыптайды», – деп мәлімдеді.

Бұл мәлімдемелердің негізсіз екені және тек делдалдық күш-жігерді бұзуға және мемлекеттер арасындағы қарым-қатынастарды әлсіретуге тырысатындардың мүддесіне қызмет ететіні атап өтілді.

«Бұл айыптаулар соғысқа байланысты гуманитарлық зардаптарды назардан тыс қалдырып, соғысты саясиландыруды жалғастыруға бағытталған жалған ақпарат науқанының жаңа кезеңін білдіреді», делінген мәлімдемеде.

Доха бұл қасіретті соғысты тоқтату үшін тиісті тараптар арасындағы делдал ретінде өзінің гуманитарлық және дипломатиялық рөліне адал екенін және бейбіт тұрғындардың өмірін қорғау үшін Мысырмен тығыз жұмыс істеп жатқанын атап өтті.

Катар сондай-ақ Мысырдың маңызды рөлін жоғары бағалап, аймақтық тұрақтылықты қамтамасыз ету үшін бірлескен делдалдықтың сәтті болуын қамтамасыз ету мақсатында күнделікті ынтымақтастық жүргізіліп жатқанын атап өтті.

‘Катаргейт’

Израильдің бұқаралық ақпарат құралдары Мысырдың ХАМАС пен Израиль арасындағы делдалдық рөлін әлсірететін ақпарат тарату үшін премьер-министр Беньямин Нетаньяхудың кеңесшілердің Катардан қаржы алғанын  хабарлағаннан кейін Катар осындай мәлімдеме жариялады.

Израиль соты бейсенбі күні Нетаньяхудың екі көмекшісінің қамаудағы мерзімін тағы бір күнге созды. Джонатан Урих және Эли Фелдштейн атты кеңесшілер  Катардан ақша алып, оны Катардың беделін көтеру үшін пайдаланған деп айыпталып отыр.

Израильдің мемлекеттік хабар таратушысы «KAN» Ришон ЛеЦион қылмыстық сотының күдіктілерді қамауда ұстау мерзімін тағы 24 сағатқа ұзартуға келіскенін, бірақ полицияның жеті күнге ұзарту туралы өтінішін қабылдамағанын хабарлады.

«KAN» тергеу барысында күдіктілердің түсініктемелерінде сәйкессіздіктер анықталғанын, ал олардың біреуі тергеу кезінде жалған мәлімет бергенін мәлімдеді, бірақ күдіктінің аты-жөнін ашпады.

Сәрсенбі күні Нетаньяху өзінің кеңесшілеріне қатысты тергеуді "далбаса" деп атады.

«The Jerusalem Post» бас редакторы Цвика Клейн осы екі кеңесшіге байланысты түсініктемесі алынғаннан кейін бейсенбі күні үй қамауынан босатылды.

Бас прокурор Гали Бахарав-Миара бұл іс бойынша тағы екі журналистіңтергеуге шақырылуы мүмкін екенін айтты.