Консерватор Кароль Навроцкий Польшадағы президенттік сайлаудың екінші кезеңінде жеңіске жетті.

Навроцкий 50,89 пайыз дауыс жинап, либерал Варшава мэрі Рафал Тшасковскийден (49,11 пайыз) аз ғана басымдықпен жеңіске жетті.

42 жастағы тарихшы және әуесқой боксшы Навроцкий ұлттық естелік институтын басқарған. Ол сайлауалды науқанында экономикалық және әлеуметтік саясаттың поляктардың мүддесіне бағытталатынын, басқа ұлттарға, соның ішінде көрші Украинадан келген босқындарға басымдық берілмейтінін уәде етті.

Польша парламенті негізгі билікті ұстап тұрғанымен, президент заңдарға вето қою құқығына ие. Сондықтан сайлауды Украина, Ресей, АҚШ және Еуропалық Одақ елдері жіті бақылады.

“Алдымен Польша, алдымен поляктар”

Навроцкий Ресейдің соғысына қарсы Украинаға қолдау көрсетуді жалғастыруға уәде бергенімен, соғыс босқындарына берілетін жеңілдіктерді сынады.

Оның Киевтің ЕО және НАТО-ға қосылу жоспарларына сыни көзқарасы және украиналық босқындарға берілетін жеңілдіктерді қысқартқысы келетіні көрші Украинамен тығыз қарым-қатынастарға нұқсан келтіруі мүмкін.

Навроцкийді қолдаушылардың көпшілігі иммиграцияға қатаң шектеулер енгізуді, консервативті әлеуметтік құндылықтарды қолдауды және елдің Еуропалық Одақ аясындағы егемендігін күшейтуді қалайды.

Навроцкий сайлауалды науқанында «Алдымен Польша, алдымен поляктар» деген ұранмен шықты.

Навроцкий сайлауалды науқаны кезінде Ақ Үйге барып, Трамптан: «Сен жеңесің» деген қолдау сөзін естігенін айтты.

АҚШ-тың Ішкі қауіпсіздік министрі Кристи Ноэм де өткен аптада Польшада өткен консервативті конференцияға қатысып, Навроцкийді қолдап, «Ол келесі президент болуы керек» деген еді.