Израильдік ақпарат құралдарының хабарлауынша, АҚШ-тың жоғары лауазымды өкілі Тель-Авив үкіметін Газа секторында бітімге келіп, тұтқындарды айырбастау жөніндегі келісімді қабылдауға шақырып, бұл орындалмаған жағдайда, "өте ауыр салдарлар болатынын" ескерткен.

“The Jerusalem Post” газетінің сәрсенбі күнгі хабарына сәйкес, АҚШ ресми өкілдері мен Газа секторында кепілде отырған израильдіктердің туыстары арасында кездесу өткен. Осы жиында америкалық жоғары шенді шенеунік Израильдің бітімді жаңартуға және тұтқындар туралы келіссөздерге қатысты әрекеттерін сынаған. Ол Израиль қатыспаса да, АҚШ-тың Сауд Арабиясымен аймақтық келісімге қол жеткізетінін мәлімдеген.

"Газа секторындағы тұтқындар бұл соғыстың аяқталмауының құнын әлдеқашан төледі. Егер осы күнге дейін олар үшін ештеңе өзгермесе, бұл құн енді тек тұтқындарға ғана емес, Израиль үшін де едәуір ауыр болмақ," – деді АҚШ өкілі.

Сондай-ақ ол Йемендегі хоуситтермен жасалған бітімнің тек бастамасы екенін айтып, "егер Израиль ақылға келмесе, тіпті “Ғасырдың келісімі” де  онсыз жүзеге асады," деп қатаң ескерту жасады.

Кездесуге қатысқан израильдік кепілдердің туыстары бұл мәлімдемені " Айтылған пікірлер Израильге үнемі шексіз қолдау білдіріп келген одақтастың көзқарасын өзгерткенін көрсетті" деп бағалады.