Сирияның қауіпсіздік күштері бұрынғы Асад режимінің қалдықтары тарапынан Латакиядағы “SADCOP” мұнай компаниясына жасалған шабуылды тойтарды.

Мемлекеттік жаңалықтар агенттігі “SANA” қауіпсіздік көзіне сілтеме жасап, Идлиб провинциясынан қауіпсіздік керуені солтүстік-батыс Сириядан жағалауға қарай Асад режимінің қалған жақтастарын қуып, аймақтағы қауіпсіздік пен тұрақтылықты қалпына келтіру үшін қозғалғанын хабарлады.

Дереккөздің айтуынша, “SADCOP”-қа жасалған шабуыл тойтарылған, бірақ қосымша мәлімет берілмеді.

Соңғы күндері Латакия мен Тартус жағалау аймақтарында қауіпсіздік шиеленістері күшейіп, Асад жақтастарының шабуылдары болуда. Бұл шабуылдар режимнің желтоқсанда құлауынан кейінгі ең ауыр шабуылдар ретінде сипатталып, қауіпсіздік патрульдері, бақылау бекеттері мен ауруханаларды нысанаға алды. Нәтижесінде өлім-жітім мен жарақаттар тіркелді.

Жауап ретінде қауіпсіздік және әскери күштер шабуылдаушыларды іздеу үшін кең ауқымды операция бастады. Бұл операциялар қатты қақтығыстарға әкелді, ал үкімет өкілдері жағдайдың толық тұрақтылыққа қарай бет алғанын мәлімдеді.

‘Күтілетін қиындықтар’

Сирия президенті Ахмед Әл-Шара елдің жағалау аймағындағы соңғы қауіпсіздік оқиғаларын «бақылауда» деп атап, оларды «күтілетін қиындықтар» деп сипаттады.

«Дағдарыс аман-есен өтті», – деді Әл-Шара Дамаск қаласындағы Әл-Меззе ауданындағы мешітте таң намазынан кейін әлеуметтік желілерде жарияланған бейнеде.

«Елде болып жатқан жағдайлар – күтілетін қиындықтар. Біз ұлттық бірлік пен азаматтық бейбітшілікті сақтауымыз керек», – деп баса айтты ол.

«Біз бұл елде бірге өмір сүре алатынымызды көрсетуіміз керек», – деді ол.

ЕО Сирияның өтпелі кезеңін бұзуға бағытталған әрекеттерді айыптады

Еуропалық Одақ бұрынғы Башар Асад режимінің қалдықтары тарапынан Сирия үкімет күштеріне жасалған шабуылдарды айыптады.

«Еуропалық Одақ Сирияның жағалау аймақтарындағы уақытша үкімет күштеріне Асад жақтастары тарапынан жасалған соңғы шабуылдарды және бейбіт тұрғындарға қарсы кез келген зорлық-зомбылықты қатаң айыптайды», – деді ЕО-ның сыртқы істер және қауіпсіздік саясаты бойынша баспасөз хатшысы Анитта Хиппер мәлімдемесінде.

Барлық сыртқы тараптарды Сирияның егемендігі, бірлігі және аумақтық тұтастығын толық құрметтеуге шақыра отырып, мәлімдемеде: «ЕО тұрақтылықты және барлық сириялықтардың әртүрлілігін құрметтейтін, инклюзивті бейбіт өтпелі кезеңнің мүмкіндіктерін бұзуға бағытталған кез келген әрекеттерді айыптайды», – делінген.

«Бейбіт тұрғындарды кез келген жағдайда халықаралық гуманитарлық құқықты толық құрметтей отырып қорғау қажет», – деп қосты ол.

Сирияны 25 жылға жуық басқарған Асад 8 желтоқсанда Ресейге қашып, 1963 жылдан бері билікте болған Баас партиясының режимі аяқталды.

Асад режимін құлатқан анти-режим күштерін басқарған Ахмед Әл-Шара 29 қаңтарда өтпелі кезеңнің президенті болып жарияланды.