Лондонның Хитроу әуежайы электр станциясындағы өрттен кейін бір күннен соң қайта ашылды.

Еуропаның ең үлкен әуежайының жабылуы жаһандық саяхат қозғалысына үлкен кедергі келтірді. Авиация саласы әуежай электр станциясында жаппай өрт шыққаннан кейін жолаушылар бағыты мен ұшу кестесін өзгерту шараларын жүргізген болатын.  

Жұма күні кешкісін кейбір рейстер қайта басталғанымен, әлемдегі бесінші ең қарбалас әуежайдың бір күн бойы жабылуы ондаған мың жолаушыны қонақүй бөлмелері мен орын ауыстыру рейстерін іздеуге мәжбүр етті.  Әуекомпаниялар ұшақтар мен экипаждарын базаларына қайтаруға тырысты. Бұл үлкен логистикалық дағдарысқа себеп болды.

Хитроу өкілінің айтуынша арнайы топ әуежайда апаттан зардап шеккен жолаушыларға қолдау көрсету үшін жұмыс істеген.

«Біз терминалдарымызда жүздеген қосымша қызметкерді жұмылдырдық және бүгінгі кестеге қосымша 10,000 жолаушы үшін рейс қостық», - деді өкіл.

Жауапкершілік туралы пікірталас

Авиация саласын миллиондаған фунт стерлинг шығынға ұшыратқан үзілістен кейін «мұндай маңызды инфрақұрылым неге резервтік жүйесіз жұмыс істейді?» деген сұрақ туындатты.

Халықаралық әуе көлігі қауымдастығының (IATA) президенті және «British Airways» компаниясының бұрынғы бас директоры Вилли Уолш «Бұл әуежайдың жоспарлаудағы қателігі», - деп сынға алды.

Жұма күні әуежай 1,351 рейспен 291,000 жолаушыны тасымалдауы керек болатын. Бірақ ұшақтар Ұлыбритания мен Еуропаның басқа әуежайларына бағытталып, көптеген ұзақ қашықтықтағы рейс бастапқы орындарына қайтарылды.

Өрттен кейін тергеу жалғасуда

Хитроу әуежайының бас директоры Томас Вольдбай сенбі күні әуежай толық ашылғанын мәлімдеді. Ол бұл жағдайдан туындаған шығындарды кім өтейтіні туралы сұраққа «Мұндай оқиғалардың нақты процедуралары бар, бірақ біздің мұндай жағдайларға қатысты нақты міндеттеріміз жоқ»,- деді.

Ұлыбританияның көлік министрлігі кептелістерді азайту мақсатында түнгі рейстерге қойылған шектеулерді уақытша алып тастады. Бірақ «British Airways» әуе компаниясының бас директоры Шон Дойл әуежайдың жабылуы алдағы күндері барлық жолаушыларға үлкен әсер ететінін айтты. «Virgin Atlantic» сенбі күні толық кесте бойынша жұмыс істейтінін, бірақ жағдайдың өзгермелі екенін және барлық рейстердің үнемі бақылауда екенін мәлімдеді.

«JetBlue», «American Airlines», «Air Canada», «Air India», «Delta Air Lines», «Qantas», «United Airlines», «British Airways» және «Virgin Atlantic» сияқты әуе компанияларының рейстері басқа әуежайларға бағытталды немесе бастапқы орындарына қайтарылды. Осы кезеңде көптеген әуе компаниясының акциялары құлдырады.

Авиация сарапшылары Еуропа әуежайлары соңғы рет осындай ауқымды қиындықтар 2010 жылы Исландиядағы жанартау күлінің бұлты кезінде болғанын мәлімдеді.

Өкілдер Еуропада шұғыл қонуға мәжбүр болған кейбір жолаушылардың қажетті құжаттары болмаса, әуежайдың транзиттік залдарында күтуі мүмкін екенін айтты.

Хитроу маңындағы қонақүй бағалары күрт өсіп, брондау сайттары бөлмелерді 645 доллардан сатты. Бұл қалыпты бағадан шамамен бес есе жоғары.

Полиция тергеуден кейін электр станциясындағы өртті күмәнді деп санамайтынын, бірақ тергеу жалғасып жатқанын мәлімдеді. Лондон өрт сөндіру қызметі тергеу электр тарату жабдықтарына бағытталатынын айтты. Соңғы жылдары Хитроу және Лондонның басқа ірі әуежайлары автоматтандырылған есіктердің істен шығуы және әуе қозғалысы жүйесінің бұзылуы сияқты түрлі техникалық ақауларға тап болды. Соңғы рет 2023 жылы болған бұл оқиғалар авиакомпанияларға елеулі қиындықтар туғызды.