Иранның Жоғары ұлттық қауіпсіздік кеңесі Израильдің ядролық нысандарына қатысты жинаған барлау деректерінің арқасында Израиль Иранға шабуыл жасаған жағдайда Иран күштері дереу қарсы шабуыл ұйымдастыра алатынын мәлімдеді.

Израиль Иранның ядролық нысандарын бірнеше рет нысанаға алатынын айтып қорқытып, өзінің мәңгілік қарсыласының ядролық қаруға ие болуына жол бермейтінін хабарлаған. Алайда Тегеран мұндай қаруға ұмтылмайтынын үнемі айтып келеді.

Бұл ескертулер Тегеран мен Вашингтон сәуір айында ядролық келіссөздер бастағаннан бері жиілей түсті.

Жоғары ұлттық қауіпсіздік кеңесі таратқан мәлімдемеде Иранның барлау деректері туралы айтылып, “Иранның ядролық нысандарына бағытталған сионистік режим шабуылына жауап ретінде ислам сарбаздары Израильдің жасырын ядролық нысандарына дереу соққы бере алады” делінген.

Сондай-ақ Иран Израильдің әскери не экономикалық инфрақұрылымына жасалатын кез келген шабуылға “тең” жауап қайтаратынын мәлімдеді.

Сенбі күні мемлекеттік БАҚ Тегеранның құпия операция барысында Израильдің ресми түрде жарияланбаған ядролық нысандары мен қорғаныс жоспарлары жөніндегі құжаттар да кіретін “стратегиялық және аса маңызды” барлау деректеріне қол жеткізгенін хабарлады.

Иранның барлау министрі Исмаил Хатиб кейінірек бұл алынған құжаттарда Батыс елдері, әсіресе Америка Құрама Штаттары туралы мәліметтер де бар екенін және “жақын арада жарияланатынын” айтты.

Дүйсенбі күні Иран Ислам революциясы сақшылар корпусының бас қолбасшысы, генерал-майор Хусейн Салами бұл барлау деректері “қақтығыс жағдайында Иран зымырандарының дәлдігін арттырады” деп мәлімдеді.

Өткен жылы Газа соғысы аясында қос тарап алғаш рет сирек те болса тікелей шабуылдар жасаған болатын.