Түркияның жетекші технологиялық іс-шарасы TEKNOFEST-тің басқарма кеңесінің төрағасы Селчук Байрактар жоғары технология мен жасанды интеллекттің жаңа әлемнің кілті екеніне тоқталды. Байрактар жасанды интеллект дұрыс мақсатта этикалық құндылықтармен үйлескенде адамзат үшін әлдеқайда жарқын болашақ ұсына алатынын айтты.
Селчук Байрактар Никосиядағы ескі Эрджан әуежайында өткен TEKNOFEST-тің Солтүстік Кипр Түрік Республикасындағы ашылу салтанатында сөйлеген сөзінде жасанды интеллект денсаулық сақтау саласына жаңашылдық, теңдестірілген білім беру мүмкіндіктері және өмірді жеңілдететін сансыз мүмкіндіктер бере алатынын атап өтті.
Әлемнің қараңғылыққа бағытталып жатқанын атап өткен Байрактар «Аймағымызда адамзатқа қарсы үлкен қылмыс, геноцид жасалуда. Газада балалар бомбаланып жатыр», - деді. «Бұл қараңғылықты тек шындықтың нұрымен сейілтуге болады. Әділдік пен жанашырлықты ілгерілету үшін технологияны қолданатын әлем құрылуы керек», - деп қосты ол.
Байрактар Солтүстік Кипр Түрік Республикасының жағдайына тоқталып, елдің тек тарихи күрестердің ғана емес, үлкен жетістіктердің де символы болуы керектігін мәлімдеді. Жерорта теңізінің қақ ортасында орналасқан Солтүстік Кипр Түрік Республикасының технология және ғылым үшін жаһандық тартымдылық орталығы болуы керек екенін атап өтіп, Солтүстік Кипр Түрік Республикасына демалыс үшін ғана емес, ғылым, технология және өндіріс үшін де саяхат етілуі керек екенін айтты.
Сонымен қатар төраға Солтүстік Кипр Түрік Республикасында жаңа идеялардың пайда болуы керектігіне тоқталып, «Ғылыми-зерттеу және тәжірибелік жұмыстар, әлемде із қалдыратын жобалар осы жерден шығуы керек», - деді.
«Солтүстік Кипр Түрік Республикасы ˗ бейбітшілік аралы, Жерорта теңізіндегі бейбітшілік, қауіпсіздік және бауырластықтың кепілі»
Түрік технология командасы (T3) қоры мен Түркияның Индустрия және технология министрлігі ұйымдастырған TEKNOFEST 2018 жылдан бері ондаған мемлекеттік мекеме, жеке сектор серіктесі мен университеттердің қолдауымен жыл сайын өткізіліп келеді. Анадолы агенттігі фестивальдің жаһандық байланыс серіктесі қызметін жалғастыруда. Іс-шара жұп сандағы жылдары Түркияның әртүрлі қалаларында, тақ сандағы жылдары Стамбулда өтеді. Солтүстік Кипр Түрік Республикасы Әзербайжаннан кейін TEKNOFEST-ті өткізген Түркиядан тыс екінші ел болды.
2024 жылы Түркияның оңтүстігіндегі Адана қаласында өткен шараға шамамен 1,1 миллион адам келген болатын.
Инновация аралы
Іс-шарада сөз сөйлеген Түркияның Өнеркәсіп және технология министрі Мехмет Фатих Кажыр барлық тараптар бірлесе жұмыс істесе, Солтүстік Кипр Түрік Республикасы инновация аралына айналуы мүмкін екенін айтты.
Министр Кажыр «100 мыңнан астам университет студенті және бірегей сұлу табиғатымен бұл жер әлемге қызмет ететін технология бастамаларының орталығы бола алады. Осы TEKNOFEST-тің алты байқауына қатысқан 47 мың жастың толқуы жарқын болашақтың жаршысы. Біздің тілегіміз бұл толқудың Солтүстік Кипр Түрік Республикасында да жалғасын табуы», - деді.
«Біз қорғаныс өнеркәсібі саласында сыртқы тәуелділіктің қиындығын жақсы білетін елміз», - деді Түркия Қорғаныс өнеркәсібі президенті Халюк Гөргүн. «TEKNOFEST еліміздің ең үлкен жаңалық алаңына айналды. Еліміздің ең құнды ресурсы жастарымыздың танылуына мүмкіндік берді», - деді ол.
