АҚШ президенті Дональд Трамп әкімшілігі бірнеше аптаға созылған қарқынды келіссөздерден кейін Украинамен тарихи экономикалық серіктестік туралы келісімге қол қойды. Бұл келісім Вашингтонға Киевтегі сирек кездесетін пайдалы қазбалар кен орындарына қол жеткізуге мүмкіндік береді.

Қаржы министрі Скотт Бессент келісімді «тарихи» деп сипаттап, «Мен тарихи экономикалық серіктестік туралы келісімге қол қойылғанын хабарлауға қуаныштымын», - деді.

Киев өзіне ресурстарын бақылауда ұстау туралы уәде берілгенін растады

Екі тарап та келісімге АҚШ президенті Дональд Трамп Киевтің Вашингтонға Ресейге тойтарыс беруге көмектескені үшін өтеуі керек екенін айтқаннан кейін қол қойды.

Украинаның жоғары лауазымды билік өкілі «АҚШ пен Украинаның экономикалық әлеуетін кеңейтуге және Украинаның қауіпсіздігіне үлес қосуға мүмкіндік беретін АҚШ-Украина қайта құру инвестициялық қорын құру туралы келісімге қол қойды», - деп хабарлады.

Ал Украина премьер-министрінің бірінші орынбасары Юлия Свириденко «X» платформасында «АҚШ-пен бірге біз елімізге жаһандық инвестиция тартатын қор құрып жатырмыз», - деп жазды.

«Бұл қорды іске асыру екі елге тең ынтымақтастық пен инвестиция арқылы экономикалық әлеуетті кеңейтуге мүмкіндік береді. АҚШ қорға үлес қосады. Тікелей қаржылық жарналардан бөлек, Украинаға арналған әуе қорғаныс жүйелері сияқты жаңа көмектер де ұсына алады», - деп қосты ол.

Украина табиғи ресурстарын бақылауда ұстайды

Трамп Ресей-Украина соғысы басталғаннан бері АҚШ жіберген миллиардтаған долларлық қару-жарақтың орнына жаңа технологиялар үшін өмірлік маңызы бар Украинаның минералдық байлығын өндіру құқығын беруді талап еткен болатын.

Бастапқыда нақты шешімге келмеген Украина АҚШ-тың ұзақ мерзімді инвестицияларын қамтамасыз ету үшін келісімді қабылдады. Трамп бүкіл әлем бойынша АҚШ-тың қауіпсіздік міндеттемелерін айтарлықтай қысқартуға ұмтылуда.

Киевте Украина премьер-министрі Денис Шмигаль екі ел қайта құру инвестициялық қорын құратынын, екі тарап та 50 пайыздық дауысқа ие екенін мәлімдеді.

«Украина өзінің ресурстарына, инфрақұрылымына және табиғи ресурстарына бақылауды толық сақтайды», - деді ол. Украинаның басты мәселесіне қатысты мәлімдемесінде ол АҚШ-тың қару-жарағы мен басқа да қолдаулары үшін ешқандай қарыз төленбейтінін айтты. «Қордан түскен пайда тек Украинаға қайта инвестицияланады», - деді министр.

Трамп бастапқыда 500 миллиард долларлық пайдалы қазбаны талап еткен болатын. Бұл АҚШ-тың Украинаға көмекке берген қаражатынан төрт есе көп. Ол Украинаға қауіпсіздік кепілдігін ұсынудан бас тартты және Украинаның НАТО-ға кіру ниетін мақұлдамады. Бірақ Трамп сәрсенбі күні АҚШ-тың аймақта болуы Украинаға пайда әкелетінін айтты.

Пайдалы қазбаларға бай

Түрлі болжамдарға қарағанда Украинада әлемдегі минералды ресурстар мен сирек жер элементтерінің шамамен 5 пайызы бар. Дегенмен көптеген ресурсты өндіру әлі басталмаған және көптеген кен орыны қазіргі уақытта Ресей күштерінің бақылауындағы аудандарда.

Францияның геологиялық және тау-кен зерттеу бюросының мәліметі бойынша Украинада дүние жүзіндегі графиттің шамамен 20 пайызы бар. Бұл электр батареялары үшін негізгі материал. Сонымен қатар Украина марганец пен титанның негізгі өндірушісі. Олар Еуропадағы ең үлкен литий кен орындарына ие екендерін айтады.

Он мыңдаған бейбіт тұрғынның өмірін қиған қақтығыстан кейін Ресей Украина аумағының 20 пайызға жуығын бақылауда ұстауда.