د ښاروال په وینا، د روسیې بریدونو د اوکراین په شمال ختیځ ښار خارکیف کې لږ تر لږه دوه کسان وژلي او ۲۸ نور یې ټپیان کړي دي، چې په کې درې ماشومان هم شامل دي.

د خارکیف ښاروال ایګور تیریخوف د سه شنبې په ورځ په ټیلیګرام کې وویل: "دښمن د بې پیلوټه الوتکو (ډرون) په وسیله په ښار کې په دوو سیمو کې ۱۷ بریدونه ترسره کړل." هغه وروسته زیاته کړه: "تر اوسه د دوو کسانو د وژل کېدو خبر ترلاسه شوی دی."

په سلوبیدسکي ولسوالۍ کې په یوه پنځه پوړیزه ودانۍ کې له ۱۵ څخه زیات اپارتمانونو اور اخیستي، په داسې حال کې چې په اوسنوویانسکي ولسوالۍ کې څو کورونه هم په نښه شوي دي.

تیریخوف زیاته کړه "شونې ده چې ځینې کسان د کنډوالو لاندې بند پاتې وي."

روسیې د اوکراین پر وړاندې خپل بریدونه زیات کړي، سره له دې چې د متحده ایالاتو له خوا د درې کلنې جګړې د درولو غوښتنې شوې دي.

د استانبول د سولې خبرو اترو په ترڅ کې د تېرې اونۍ په پای کې د بندیانو د تبادلې تړون ترسره شو، چې دا د خبرو اترو یو مهم پرمختګ ګڼل کېږي، خو د جګړې د پای ته رسولو لپاره لا هم کومه موافقه نه ده شوې.