د چین هوواوې ټکنالوژۍ شرکت د خپل تر ټولو پرمختللي مصنوعي ځيرکتيا پروسیسر د ازموینې لپاره چمتووالی نیسي، ترڅو د امریکا د مخکښ چپ جوړونکي Nvidia د لوړ پای چپونو لپاره یو کورنی بدیل وړاندې کړي.

نوی چپ چې د Ascend 910D په نوم یادیږي، لا هم د پرمختګ په پړاو کې دی، خو په چین کې د ټکنالوژۍ په صنعت کې یې پام ځانته اړولی او نړیواله توجه یې هم جلب کړې ده.

هوواوې د چینایي شرکتونو سره اړیکه نیولې ترڅو د دې چپ وړتیاوې وازمويي، ځکه چې دا هڅه کوي د Nvidia د H100 پروسیسر سره سیالي وکړي.

امریکایي ټکنالوژۍ لوی شرکت Nvidia د امریکا لخوا د لوړو پایو چپونو چین ته د صادرولو څخه منع شوی، چې دا د بیجینګ د ټکنالوژۍ په نړۍ کې د پرمختګ د ورو کولو هڅه ده.

خو منتقدین وایي چې دا ګام ښایي برعکس اغېز ولري. د SemiAnalysis مشر تحلیلګر ډیلن پټیل د امریکا لخوا د چپونو د صادراتو کنټرولونه "ډېر لنډ نظره" بولي.

د هوواوې چارواکي هیله لري چې 910D  به په ځینو برخو کې د H100 څخه غوره کار وکړي. هغه شرکتونه چې د دې چپ لومړني نسخې ازمويي، لا هم د دې بشپړ وړتیاوې په خپلواکه توګه نه دي تایید کړي. تمه کیږي چې د دې چپ نمونې د مې میاشتې تر پایه وړاندې شي.

د SemiAnalysis څخه AJ کورابي وایي: "دا یو مهم پرمختګ دی، ځکه چې مخکې چینایي شرکتونه اړ وو چې د خپلو ماډلونو د لویې کچې روزنې او خدمت لپاره د Nvidia چپونه وکاروي." هغه زیاتوي چې یو عملي کورنی بدیل د عملیاتو خپلواکي برابروي، چې دا د "ممکنه ګواښ" په توګه لیدل کیږي، ځکه چې دا کولی شي چینایي شرکتونو ته د امریکایي شرکتونو سره د سیالۍ زمینه برابره کړي.

هوواوې د بندیزونو سره سره په نورو برخو کې هم د پام وړ پرمختګ کړی دی. د تیر کال په وروستیو کې، هوواوې د Mate 70 لړۍ ځيرک تلیفونونو په وړاندې کولو سره د خلکو پام ځانته واړاوه. دا تلیفونونه د پرمختللو HiSilicon چپونو سره سمبال وو، چې د 2023 کال د Mate 60 Pro  بریالي خپرولو وروسته وړاندې شول، کوم چې د Kirin 9000s پروسیسر درلود.

دا بدلون د صنعت ډیرو څارونکو ته حیرانونکی و، چا چې فکر کاوه چې د واشنګټن لخوا د چپونو د پلور محدودیتونه به د هوواوې د هارډویر ارادې په جدي توګه محدودې کړي. خو وروستي پرمختګونو دا نظر بدل کړی، او د هوواوې د نړیوالو ټکنالوژۍ مشرانو سره د سیالۍ وړتیا باندې باور نور یوازې په چین کې محدود نه دی.

د تیرې میاشتې په ترڅ کې، د Nvidia بنسټ ایښودونکي جینسن هوانګ، هوواوې د چین "تر ټولو ځواکمن ټکنالوژۍ شرکت" وباله.

هغه وویل: "هغوی هر هغه بازار فتح کړی چې دوی پکې ښکېل شوي دي." هغه د دې شرکت د محدودولو لپاره د امریکا په مشرۍ هڅې هم وغندلې، چې د هغه په وینا "په سمه توګه نه وې ترسره شوې" ځکه چې د دوی بریا دوام لري.

د ټکنالوژۍ تحلیلګر ګریس شاو په وینا، چین د Nvidia د کلني عوایدو شاوخوا ۲۰ څخه تر ۲۵ سلنه برخه جوړوي. که چینایي شرکتونه د هوواوې په څېر کورنیو بدیلو ته مخه کړي، نو اغېزې به یوازې په جیوپولیټیک اړخ کې نه، بلکې د امریکایي ټکنالوژۍ لویو شرکتونو په مالي حسابونو کې هم محسوسې شي.

د ځان بسیاینې مصنوعي ځيرکتيايې نظام؟

سره له دې چې هوواوې د امریکا د سختو محدودیتونو لاندې فعالیت کوي، چې موخه یې د کلیدي ټکنالوژیو او بازارونو ته د دې لاسرسی محدودول دي، خو دې شرکت د پام وړ پرمختګ کړی دی.

ویل کیږي چې د شینژین میشته شرکت د چین په کچه د ټول تولید شوي مصنوعي ځيرکتيا چپونو له درې برخو څخه زیات جوړوي.

ګریس شاو وایي: "کله چې د چپ بندیز نافذ شو، چینایي مصنوعي ځيرکتيا شرکتونو د چپونو ذخیره کول پیل کړل. خو د هوواوې د Ascend 910B او بیا 910 C چپونو وړاندې کولو په چین کې نظام ګډوډ کړ او د Nvidia د مشهور A100 چپ لپاره یې تر ټولو عملي بدیل وړاندې کړ.

د هوواوې زاړه مصنوعي ځيرکتيا چپونه د چینSemiconductor Manufacturing International Corporation (SMIC) لخوا جوړ شوي وو. دا چپونه د ۷ نانومیتر ټکنالوژۍ کاروي، چې د TSMC او سامسنګ د ۴ نانومیتر ټکنالوژۍ په پرتله لږ پرمختللي دي.

خو بیا هم دې چپونو د پام وړ پرمختګ ښودلی دی. د ښه چپونو تولید د شاوخوا ۲۰ سلنې څخه ۴۰ سلنې ته لوړ شوی دی. دا زیاتوالی ښيي چې SMIC خپل موثریت ښه کړی او ضایعات یې کم کړي، چې دا د فعالیت یو مهم معیار دی.

سربېره پر دې، دا پرمختګ د بیجینګ د کورني چپ پرمختګ د څو کلونو هڅو سره سمون لري، چې دا د بندیزونو پر وړاندې یوازې یو غبرګون نه، بلکې د اوږدې مودې ملي ستراتیژي ده.

کورابي ټي آر ټي ورلډ ته وویل: "چین له اوږدې مودې راهیسې د محلي وړتیاوو په پراختیا کې علاقه درلوده." هغه زیاته کړه چې د امریکا د صادراتو کنټرولونه ښایي بیړنۍ اړتیا زیاته کړې وي، خو دوی په یوازې ځان د سیمه ایزو تولیداتو په لور هڅونه نه ده پیل کړې.

کورابي وایي چې د چین د مصنوعي ځيرکتيا په منظره کې د بدلون امکان شته، ځکه چې هوواوې خپلې وړتیاوې د "ځان بسیاینې مصنوعي ځيرکتيا نظام" جوړولو په لور زیاتوي.

د ولسمشر شي جینپینګ سره د یوې غونډې پر مهال، د هوواوې بنسټ ایښودونکي رین ژینګفي د چین پرمختګ ته اشاره وکړه، ویې ویل چې هېواد نور "د زړه او روح له نشتوالي" احساس نه کوي. 

دا عبارت چې په لومړي ځل په ۱۹۹۹ کال کې کارول شوی و، د لویدیځې ټکنالوژۍ پر انحصار د چین حالت بیانوي، چیرې چې "زړه" د سیمیکنډکټرونو او "روح" د عملیاتي سیستمونو لپاره کارول کیده.