روسیې په لرې ختیځ کې د خپلې لا درکه شوې الوتکې د موندولو نه خبر ورکړ.
روسیې د سه شنبې په ورځ وویل هغه الوتکه چې د هېواد د لرې ختیځې سیمې په فضا کې د بیړني حالت سیګنال ورکړی و او لادرکه شوې وه، موندل شوې ده، او په کې ټول پنځه کسان ژوندی دي.
د روسیې د ساخا جمهوریت د چاپیریال، طبیعت مدیریت او ځنګلونو وزیر، یفګیني پرفیلییف، په ټیلیګرام کې په یوه بیان کې وویل: "الوتکه موندل شوې ده، ټول کسان ژوندی دي."
تر دې وړاندې، د روسیې دولتي خبري اژانس تاس راپور ورکړی و چې یوه انتونوف ان-۲ الوتکه د ټومپونسکي ولسوالۍ په سیمه کې د ځنګلونو د ساتنې په موخه د الوتنې پر مهال خپل بیړنی سیګنال فعال کړی و.
ټومپونسکي ولسوالۍ د سایبریا د ساخا جمهوریت په ختیځ کې یوه پراخه او کم نفوسه سیمه ده چې په غرنیو سیمو او ګڼو ځنګلونو مشهوره ده.
تاس وویل چې د روسیې د ملکي هوايي چلند اداره، روساویاتسیا، د الوتکې او په کې د پنځو کسانو د موندلو لپاره د لټون او ژغورنې هڅې ترسره کولې.
