په همدې حال کې، د امریکا چارواکو او د موضوع سره اشنا سرچینو سي این این ته ویلي چې د ټرمپ اداره د تهران سره د اټومي خبرو بیا پیلولو لپاره په پټو ډیپلوماتیکو هڅو بوخته ده.
راپورونه ښيي چې اداره د بندیزونو نرمولو، محدودو فنډونو ته د لاسرسي اجازه ورکولو، او د ۲۰-۳۰ میلیارد ډالرو ملکي اټومي پروګرام ملاتړ په ګډون مختلفې لارې څېړي چې د یورانیمو غني کول پکې شامل نه وي.
سره له دې چې د امریکا ولسمشر ډونالډ ټرمپ ویلي چې هغه تمه لري خبرې "راتلونکې اونۍ" پیل شي، عراقچي دغه ادعاوې رد کړې.
عراقچي هغه "ګمانونه" رد کړل چې تهران به میز ته راشي، او ویې ویل چې "باید جدي ونه نیول شي."
"زه غواړم په واضح ډول ووایم چې د نویو خبرو د پیل لپاره هیڅ ډول موافقه، ترتیبات یا خبرې نه دي شوي،" هغه د دولتي تلویزیون له لارې وویل. "تر اوسه د خبرو د پیل لپاره هیڅ پلان نه دی جوړ شوی."
د اسرائيل سره د جګړې د اوربند وروسته په خپله لومړۍ وینا کې، د ایران ستر مشر علي خامنه اي هغه څه چې یې د اسرائيل پر وړاندې د ایران "بریا" وبلله وستایله، ژمنه یې وکړه چې د امریکا فشار ته به هیڅکله تسلیم نه شي او ټینګار یې وکړ چې واشنګټن ته یوه سپکه "څپېړه" ورکړل شوې ده.
خامنه اي وویل: "د امریکا ولسمشر په غیر معمولي ډول پېښې مبالغه کړې، او څرګنده شوه چې هغه دې مبالغې ته اړتیا لرله،" د امریکا هغه ادعاوې یې رد کړې چې د ایران اټومي پروګرام د لسیزو لپاره شاته غورځول شوی.
د عمان خبرې
د سپینې ماڼۍ ویاندې کارولین لیویټ وضاحت ورکړ چې که څه هم امریکا د ایران سره په نږدې اړیکه کې پاتې شوې — اکثره د منځګړو له لارې — خو تر اوسه کومې خبرې نه دي پلان شوې.
هغې وویل: "موږ تل په ډیپلوماسۍ او سولې تمرکز کوو."
"موږ غواړو چې ایران د غني کولو پرته د یو سوله ییز ملکي اټومي پروګرام سره موافقه وکړي."
د ټرمپ د ادارې اوسنی دریځ به دا وي چې ایران غني شوی یورانیم وارد کړي نه دا چې خپله یې تولید کړي، چې دا د متحده عربي اماراتو د ماډل سره ورته دی.
د دواړو هېوادونو ترمنځ خبرې مخکې پنځم پړاو ته رسېدلې وې خو د اسرائيلي بریدونو له امله ګډوډې شوې.
شپږم پړاو چې ټاکل شوې وه په عمان کې ترسره شي، لغوه شو.
