ტექნოლოგიური კომპანიების მხარდაჭერით, ჰონგ-კონგის საფონდო ბირჟის ინდექსი ორნახევარ პროცენტზე მეტად გაიზარდა. მნიშვნელოვანი ზრდა დაფიქსირდა ასევე ტოკიოს, შანხაის, სიდნეის, სეულის, სინგაპურის, ველინგტონის, ტაიბეისა და მანილის ბირჟებზეც.

აზიის საფონდო ბირჟები გაიზარდა მას შემდეგ, რაც დონალდ ტრამპმა ელექტრონულ პროდუქტებზე საბაჟო გადასახადებისგან გათავისუფლება გამოაცხადა, რამაც სავაჭრო ომთან დაკავშირებული შიშები შეამსუბუქა. თუმცა, იმის შიშით, რომ ეს შვება შესაძლოა ხანმოკლე იყოს, დოლარი დასუსტდა, ხოლო ოქრომ, რომელიც „უსაფრთხო თავშესაფრად“ ითვლება, ახალ რეკორდულ ნიშნულს მიაღწია.

გასულ კვირას მომხდარი მკვეთრი რყევების შემდეგ, ბაზრებმა ორშაბათი შედარებით მშვიდად დაიწყეს. ეს მოხდა მას შემდეგ, რაც თეთრმა სახლმა პარასკევს განაცხადა, რომ სმარტფონები, ნახევარგამტარები, კომპიუტერები და ზოგიერთი სხვა მოწყობილობა გათავისუფლდებოდა დამატებითი საბაჟო გადასახადებისგან.

ამ განცხადებამ იმედისმომცემი ოპტიმიზმი შესძინა ინვესტორებს, რომლებიც შეშფოთებულნი იყვნენ აშშ-ის პრეზიდენტის მიერ საბაჟო გადასახადებთან დაკავშირებით მიღებული ურთიერთგამომრიცხავი გადაწყვეტილებებითა და ჩინეთის საპასუხო ნაბიჯებით.

უოლ სტრიტის სამმა მთავარმა ინდექსმა დღე მნიშვნელოვანი ზრდით დაასრულა, მას შემდეგ რაც აშშ-ის ფედერალური სარეზერვო სისტემის (Fed) წარმომადგენლებმა განაცხადეს, რომ მზად იყვნენ ფინანსური ბაზრების მხარდასაჭერად საჭიროების შემთხვევაში ჩარეულიყვნენ.

აზიის ბაზრებიც ამ აღმასვლას შეუერთდნენ. ტექნოლოგიური კომპანიების მხარდაჭერით ჰონგ-კონგის ბირჟა ორნახევარ პროცენტზე მეტად გაიზარდა, ხოლო ტოკიოს, შანხაის, სიდნეის, სეულის, სინგაპურის, ველინგტონის, ტაიბეისა და მანილის ბირჟებმაც ძლიერი ზრდა აჩვენეს.

Pepperstone-ის კრის ვესტონმა აღნიშნა: „ქაოტური ფასების მოძრაობის შემდეგ, ეს [გარკვევა] შუქურას ჰგავს, რომელიც რისკისა და ლიკვიდურობის შემფასებლებს ასე საჭირო მიმართულებას აძლევს. ამან შეიძლება გააუმჯობესოს ლიკვიდურობის პირობები და ბაზრებზე შედარებითი სიმშვიდე დაამყაროს“.

ახალი გადასახადი ნახევარგამტარებზე

თუმცა, ტრამპმა კვირას განაცხადა, რომ გათავისუფლებები არასწორად იქნა გაგებული და Truth Social პლატფორმაზე დაწერა: „არავინ არის „გადარჩენილი“, განსაკუთრებით ჩინეთი, რომელიც ჩვენ ყველაზე ცუდად გვექცევა!“. მან ასევე თქვა, რომ „მომავალ კვირას“ ნახევარგამტარებზე ახალ გადასახადს გამოაცხადებდა.

ვაჭრობის მდივანმა ჰოვარდ ლუტნიკმა აღნიშნა, რომ ჩიპებზე გადასახადები შესაძლოა „ერთ ან ორ თვეში“ ამოქმედდეს. თავის მხრივ, ჩინეთის პრეზიდენტმა სი ძინპინმა ორშაბათს განაცხადა, რომ პროტექციონიზმს „არსად მივყავართ“ და სავაჭრო ომს „გამარჯვებული არ ეყოლება“. თუმცა, მან მიანიშნა, რომ პეკინი აღარ მიიღებდა დამატებით საპასუხო ზომებს მას შემდეგ, რაც აშშ-ის საქონელზე 125%-იანი გადასახადი დააწესა.

ვაშინგტონმა ჩინურ საქონელზე ტარიფები 145%-მდე გაზარდა და ჩინეთი არ შეიყვანა იმ ქვეყნების სიაში, რომლებსაც ოთხშაბათს გამოცხადებული, მძიმე გადასახადებისგან 90-დღიანი გათავისუფლება შეეხო.

ტრამპის სავაჭრო პოლიტიკით გამოწვეულმა გაურკვევლობამ დოლარის კურსზეც იქონია გავლენა. მსოფლიოს უდიდესი ეკონომიკის მომავალთან დაკავშირებული შიშების ფონზე, დოლარი ორშაბათს ძირითად ვალუტებთან მიმართებით გაუფასურდა. ევრო სამწლიან მაქსიმუმამდე გამყარდა, ხოლო შვეიცარიულმა ფრანკმა ბოლო ათწლეულის უმაღლეს ნიშნულს მიაღწია.

ოქროს ფასი გაიზარდა

აშშ-ის სახაზინო ობლიგაციები კვლავ ზეწოლის ქვეშ რჩება იმის შიშით, რომ ჩინეთმა და სხვა ქვეყნებმა შესაძლოა დიდი რაოდენობით ობლიგაციები გაყიდონ. ამან შეიძლება კითხვის ნიშნის ქვეშ დააყენოს აშშ-ის, როგორც „უსაფრთხო თავშესაფრის“ სტატუსი. ამასთან, ოქრომ, რომელიც კრიზისის დროს უსაფრთხო საინვესტიციო აქტივად ითვლება, ორშაბათს ახალ რეკორდულ ნიშნულს მიაღწია - 3,245.75 $. ამ ზრდას დოლარის შესუსტებამაც შეუწყო ხელი.

ბოსტონის ფედერალური სარეზერვო ბანკის პრეზიდენტმა, სიუზან კოლინზმა, Financial Times-თან ინტერვიუში განაცხადა, რომ ოფიციალური პირები „ნამდვილად მზად“ იქნებიან, გამოიყენონ საჭირო ინსტრუმენტები ფინანსური ბაზრების სტაბილიზაციისთვის. Yahoo Finance-თან ცალკე ინტერვიუში კი აღნიშნა: „რაც უფრო მაღალია ტარიფები, მით მეტია ზრდის შენელებისა და ინფლაციის ზრდის პოტენციალი“.

კოლინზმა დასძინა, რომ წელს ინფლაციის „სამ პროცენტზე მნიშვნელოვნად მაღლა“ ასვლას ელის, თუმცა „მნიშვნელოვან“ ეკონომიკურ რეცესიას არ პროგნოზირებს.