ბოსნიელი სერბი ლიდერის, მილორად დოდიკისა და სერბეთის რესპუბლიკის (RS) ასამბლეის თავმჯდომარის, ნენად სტევანდიჩის მიმართ ინტერპოლის მიერ დაკავების საერთაშორისო ორდერი გაიცა. ინფორმაცია სერბულმა გაზეთმა „პოლიტიკამ“ გაავრცელა.

ინტერპოლის სარაევოს ოფისის მიერ ინიცირებული დაკავების ორდერები ბოსნია და ჰერცეგოვინის სისხლის სამართლის კოდექსის 156-ე მუხლით გათვალისწინებულ კონსტიტუციური წესრიგის დარღვევის ბრალდებებს ეფუძნება. გაზეთ „პოლიტიკას“ თანახმად, ორდერები ინტერპოლის ყველა წევრ ქვეყანაშია დაგზავნილი, მაგრამ სამართლებრივი განხილვის პროცესი გრძელდება.

დოდიკი ცოტა ხნის წინ სერბეთში გაემგზავრა და ნატოს ოპერაცია „მოკავშირეთა ძალის“ 26-ე წლისთავისადმი მიძღვნილ ცერემონიას დაესწრო.

26 მარტს ბოსნია და ჰერცეგოვინის სასაზღვრო პოლიციამ დაიწყო გამოძიება იმის თაობაზე, თუ როგორ გადაკვეთა დოდიკმა სერბეთის საზღვარი, მიუხედავად იმისა, რომ მის მიმართ დაკავების აქტიური ორდერი არსებობდა.

თუმცა, გავრცელდა ინფორმაცია, რომ დოდიკი იმავე დღეს სერბეთიდან ისრაელში გაემგზავრა.