სასარჩელო განცხადებაში ნათქვამია, რომ კალიფორნია, როგორც აშშ-ის საქონლის უმსხვილესი იმპორტიორი, საბაჟო გადასახადების ხარჯების „არაპროპორციულ წილს“ იღებს საკუთარ თავზე.
კალიფორნია გახდა აშშ-ის პირველი შტატი, რომელმაც პრეზიდენტ დონალდ ტრამპს საბაჟო გადასახადებთან დაკავშირებული პრაქტიკის გამო უჩივლა.
„დღეს გამოვაცხადე, რომ კალიფორნიის შტატის სახელით ტრამპის ადმინისტრაციის წინააღმდეგ სარჩელი შევიტანეთ“, - განაცხადა გუბერნატორმა გევინ ნიუსომმა ვიდეომიმართვაში, ფედერალურ სასამართლოში სარჩელის შეტანის შემდეგ. სარჩელი მიმართულია ტრამპის მიერ საერთაშორისო ეკონომიკური საგანგებო უფლებამოსილების აქტის (IEEPA) გამოყენების წინააღმდეგ, კონგრესის თანხმობის გარეშე საბაჟო გადასახადების დასაწესებლად.
„კალიფორნია ჩვენი ქვეყნის უმსხვილესი მწარმოებელი შტატი და მსოფლიოში ერთ-ერთი უდიდესი სავაჭრო პარტნიორია. ტრამპის ადმინისტრაციის მიერ წამოყენებული ცალმხრივი უფლებამოსილების გამო, დააწესოს თანამედროვე ამერიკის ისტორიაში ყველაზე დიდი საგადასახადო ზრდა, არც ერთი შტატი არ დაზარალდება ისე, როგორც კალიფორნია“, - დაამატა მან.
„ეს ქვეყნის ისტორიაში ყველაზე დიდი ავტოგოლია“, - თქვა ნიუსომმა. „თანამედროვე ამერიკის ისტორიაში ერთ-ერთი ყველაზე თვითგანადგურებისკენ მიმართული ნაბიჯია“.
კალიფორნია, 40 მილიონიანი მოსახლეობით და დიდი, გარე სამყაროზე ორიენტირებული ეკონომიკით, რომელიც აშშ-ის მშპ-ს 14%-ს შეადგენს, როგორც ჩანს, ბოლო რყევებით გამოწვეული მოსალოდნელი ეკონომიკური ზარალის უდიდეს ტვირთს იტვირთავს.
ნიუსომის ადმინისტრაცია აცხადებს, რომ კალიფორნიამ, რომელიც დამოუკიდებელი ქვეყანა რომ ყოფილიყო, მსოფლიოს მეხუთე უმსხვილესი ეკონომიკა იქნებოდა, შესაძლოა მილიარდობით დოლარის შემოსავალი დაკარგოს, თუ ტრამპის სატარიფო პოლიტიკა საერთაშორისო ვაჭრობას შეამცირებს.
„უფლებამოსილება არ არსებობს“
„აშშ-ის კონსტიტუცია საბაჟო გადასახადების დაწესების უფლებამოსილებას კონგრესს ანიჭებს, ხოლო IEEPA, რომელსაც ტრამპი ახალი საბაჟო გადასახადებისთვის უფლებამოსილების წყაროდ ასახელებს, პრეზიდენტს არ ანიჭებს უფლებას, „აშშ-ში შემოსული ყველა საქონელი თვითნებურად დაბეგროს““, - ნათქვამია შტატის სასარჩელო განცხადებაში.
„პრეზიდენტ ტრამპის ახალმა სატარიფო რეჟიმმა უკვე დამანგრეველი გავლენა მოახდინა ეკონომიკაზე; მან ქაოსი შექმნა საფონდო და ობლიგაციების ბაზრებზე, საათებში წაშალა ასობით მილიარდი დოლარის საბაზრო ღირებულება, შეაფერხა ინვესტიციები ასეთი მნიშვნელოვანი საპრეზიდენტო ქმედებით, რომელიც ყოველგვარი შეტყობინებისა და პროცედურის გარეშე განხორციელდა, და ქვეყანას რეცესიის საფრთხის წინაშე აყენებს“, - ნათქვამია სარჩელში.
სასარჩელო განცხადების თანახმად, კალიფორნია, რომელიც აშშ-ის შტატებს შორის უმსხვილესი იმპორტიორი და მსოფლიოს მეხუთე უდიდესი ეკონომიკაა, საბაჟო გადასახადების ხარჯების „არაპროპორციულ წილს“ იღებს საკუთარ თავზე.
თეთრი სახლის სპიკერმა კუშ დესაიმ ოთხშაბათს განაცხადა, რომ კალიფორნიის გუბერნატორმა გევინ ნიუსომმა, ტრამპის საბაჟო გადასახადების დაბლოკვის მცდელობის ნაცვლად, თავის შტატში დანაშაულის, უსახლკარობისა და მაღალი ფასების პრობლემებს უნდა მიხედოს.
„ტრამპის ადმინისტრაცია სრულად არის მზად, ხელთ არსებული ყველა ინსტრუმენტით, საბაჟო გადასახადებიდან დაწყებული მოლაპარაკებებით დამთავრებული, გაუმკლავდეს ამ ეროვნულ საგანგებო მდგომარეობას, რომელიც ანადგურებს ამერიკის ინდუსტრიებს და ზიანს აყენებს ჩვენს მუშახელს“, - თქვა დესაიმ.
