ამერიკის მუსლიმთა ურთიერთობების საბჭომ (CAIR) რუმეისა ოზთურქის დაპატიმრება „გატაცებად“ და „რეპრესიად“ შეაფასა, თურქეთის საელჩომ ვაშინგტონში კი განაცხადა, რომ საკითხს ყურადღებით აკვირდება და საჭირო ნაბიჯებს დგამს.

ამერიკელმა დეპუტატებმა და უფლებადამცველმა ჯგუფებმა ტაფტსის უნივერსიტეტის დოქტორანტის და ფულბრაიტის სტიპენდიატის, თურქი სტუდენტის რუმეისა ოზთურქის ისრაელის კრიტიკის შემდეგ დაპატიმრება სიტყვის თავისუფლებასა და სამოქალაქო უფლებებზე სახიფათო თავდასხმად დაგმეს.

ოზთურქი ნიღბიანი ფედერალური აგენტების მიერ დღისით დააკავეს. ოფიციალური პირები ამტკიცებენ, რომ ის პალესტინის წინააღმდეგობის ჯგუფ „ჰამასის“ მხარდამჭერ საქმიანობაში იყო ჩართული. თუმცა, მისი ოჯახი და ადვოკატები ამ ბრალდებას კატეგორიულად უარყოფენ.

მიჩიგანელმა დემოკრატმა წარმომადგენელმა რაშიდა ტლაიბმა დაპატიმრება მკაცრად გააკრიტიკა და განაცხადა, რომ სამთავრობო რეპრესიები იზრდება.

„ტრამპის ადმინისტრაცია ხალხს ქუჩაში იტაცებს,“ - დაწერა ტლაიბმა ინსტაგრამზე. „ისინი ამას პალესტინელებითა და უფლებადამცველებით იწყებენ... მაგრამ აქ არ გაჩერდებიან. შემდეგი იქნებიან გარემოსდამცველი აქტივისტები, აბორტის უფლების დამცველები, კორპორაციების სიხარბის წინააღმდეგ მებრძოლები, პროფკავშირის წევრები და სხვები, ვინც „პროექტ 2025“-ს ეწინააღმდეგება“.

სენატორმა ელიზაბეტ უორენმაც გააკრიტიკა ადმინისტრაციის ქმედებები და აღნიშნა, რომ ეს ფუნდამენტურ უფლებებზე უფრო ფართო თავდასხმის ნაწილია.

„ეს დაპატიმრება სამოქალაქო თავისუფლებების შეზღუდვის შემაშფოთებელი ტენდენციის ბოლო მაგალითია“, - განაცხადა უორენმა. „ტრამპის ადმინისტრაცია იღებს სამიზნედ ლეგალური სტატუსის მქონე სტუდენტებს და ადამიანებს ართმევს მათ თემებს სამართლიანი სასამართლოს უფლების მინიჭების გარეშე. ეს არის თავდასხმა ჩვენს კონსტიტუციასა და ფუნდამენტურ თავისუფლებებზე — და ჩვენ ამას ვებრძოლებით“.

თურქეთის საელჩომ ვაშინგტონში განაცხადა, რომ ოზთურქის დაკავებასთან დაკავშირებულ სიტუაციას ყურადღებით აკვირდება და აშშ-ის ხელისუფლებასთან საჭირო კონტაქტები დამყარებულია.

„შემაშფოთებელი რეპრესიული აქტი“

უფლებადამცველმა ორგანიზაციებმაც გაიზიარეს ეს შეშფოთება.

ამერიკის მუსლიმთა ურთიერთობების საბჭოს (CAIR) მასაჩუსეტსის ფილიალის აღმასრულებელმა დირექტორმა, ტაჰირა ამატულ-ვადუდმა, ოზთურქის დაკავება „გატაცების ფაქტად“ და აკადემიურ თავისუფლებაზე თავდასხმად შეაფასა.

„ჩვენ კატეგორიულად ვგმობთ ახალგაზრდა, თავსაფრიანი მუსლიმი აკადემიკოსის ნიღბიანი ფედერალური აგენტების მიერ დღისით გატაცებას“, - განაცხადა ამატულ-ვადუდმა. „რეპრესიის ეს შემაშფოთებელი აქტი პირდაპირი თავდასხმაა სიტყვისა და აკადემიურ თავისუფლებაზე. მასაჩუსეტსის მოსახლეობამ უნდა დაინახოს აქ შექმნილი სახიფათო პრეცედენტი — ფედერალური მთავრობა მკაცრ ზომებს იღებს მათ გასაჩუმებლად, ვინც ამბობს, რომ ჩვენი ქვეყანა პალესტინელი ხალხის გენოციდის თანამონაწილეა. ჩვენ ვითხოვთ რუმეისა ოზთურქის დაუყოვნებლივ და უსაფრთხოდ გათავისუფლებას და მისი დაკავების შესახებ სრული გამჭვირვალობის უზრუნველყოფას“.

ოზთურქი აშშ-ის საიმიგრაციო და საბაჟო აღსრულების (ICE) თანამშრომლებმა სამშაბათს გვიან, მასაჩუსეტსის ქალაქ სომერვილში, მისი სახლის მახლობლად დააკავეს, როდესაც ის რამაზანის თვეში იფთარზე მიდიოდა.

მისი დაპატიმრება მოჰყვა კამპანიას, რომელსაც აწარმოებდა ვებგვერდი Canary Mission, სადაც პრო-ისრაელური აქტივისტები სამიზნედ იღებენ პალესტინის მხარდამჭერ სტუდენტებსა და აქტივისტებს. 2024 წელს ოზთურქმა გაზეთ Tufts Daily-ში გამოაქვეყნა სტატია, რომელშიც უნივერსიტეტის ადმინისტრაციას პალესტინის გენოციდის აღიარებისა და ისრაელთან დაკავშირებული კომპანიებიდან ინვესტიციების გატანისკენ მოუწოდა.

ოზთურქის დაკავების ამსახველმა კადრებმა სოციალურ მედიაში დიდი გამოხმაურება გამოიწვია. ვიდეოში ჩანს, როგორ ადებენ ნიღბიანი პირები ხელბორკილებს ოზთურქს, მიუხედავად იმისა, რომ ის წინააღმდეგობას არ უწევს.

პალესტინის მხარდამჭერ სტუდენტებზე ზეწოლა

ოზთურქის დაკავება ემთხვევა პერიოდს, როდესაც ტრამპის ადმინისტრაცია აძლიერებს რეპრესიებს პალესტინის მხარდამჭერი სტუდენტებისა და აკადემიკოსების მიმართ.

8 მარტს ოფიციალურმა პირებმა კოლუმბიის უნივერსიტეტის სტუდენტი და ცნობილი პალესტინელი აქტივისტი მაჰმუდ ხალილი დააკავეს. ტრამპმა დაპატიმრება მოიწონა და განაცხადა, რომ ეს „მრავალთაგან პირველი“ იქნებოდა.

ტრამპმა, ყოველგვარი მტკიცებულების გარეშე, ხალილი „ჰამასის“ მხარდაჭერაში დაადანაშაულა. ხალილმა კი კატეგორიულად უარყო კავშირი წინააღმდეგობის ჯგუფთან.

ხალილის დაპატიმრებიდან რამდენიმე დღეში, ასევე დააკავეს ჯორჯთაუნის უნივერსიტეტის ინდური წარმოშობის მკვლევარი ბადარ ხან სური. ვარაუდობენ, რომ ის სამიზნე გახდა იმის გამო, რომ პალესტინელ ქალზეა დაქორწინებული.

სურის დაპატიმრების შემდეგ, ოფიციალურმა პირებმა კიდევ ერთი პალესტინის მხარდამჭერი სტუდენტი, მომოდუ ტაალი, გააფრთხილეს, რომ ჩაბარებულიყო.

ხოლო 25 მარტს, კოლუმბიის უნივერსიტეტის კიდევ ერთმა პალესტინის მხარდამჭერმა სტუდენტმა, იუნსეო ჩუნგმა, განაცხადა, რომ ტრამპის ადმინისტრაციას უჩივლა იმის გამო, რომ ოფიციალური პირები არაერთხელ შეიჭრნენ მის სახლში.