პარასკევს მოსკოვის მახლობლად გაჩერებულ მანქანაში დამონტაჟებული ასაფეთქებელი მოწყობილობა აფეთქდა, რასაც მაღალი რანგის რუსი გენერლის სიკვდილი მოჰყვა. საგამოძიებო კომიტეტმა, რომელიც ქვეყანაში მნიშვნელოვან დანაშაულებს იძიებს, განაცხადა, რომ მომხდარზე მკვლელობის მუხლით გამოძიება დაიწყო.

ხელისუფლების წარმომადგენლებმა განაცხადეს, რომ მსხვერპლი რუსეთის გენერალური შტაბის მთავარი ოპერატიული სამმართველოს უფროსის მოადგილე, გენერალ-ლეიტენანტი იაროსლავ მოსკალიკი იყო.

გამომძიებლების თქმით, მათ მოსკოვის აღმოსავლეთით მდებარე დაბა ბალაშიხაში, საცხოვრებელი კორპუსის წინ გაჩერებული Volkswagen Golf-ის მარკის ავტომობილის აფეთქების შემდეგ, მკვლელობისა და ასაფეთქებელი ნივთიერებების კონტრაბანდის მუხლებით დაიწყეს გამოძიება.

სოციალურ ქსელებში გავრცელებული შემთხვევის ადგილიდან გადაღებული კადრები აჩვენებს, რომ მანქანა მთლიანად დაიწვა.

საგამოძიებო საინფორმაციო ვებგვერდმა Agentstvo-მ, გაჟონილ ინფორმაციაზე დაყრდნობით, განაცხადა, რომ მოსკალიკი ბალაშიხაში ცხოვრობდა, თუმცა აფეთქებული მანქანა მის სახელზე რეგისტრირებული არ იყო.

გაზეთ „იზვესტიას“ მიერ გამოქვეყნებული სათვალთვალო კამერის კადრები აჩვენებს ძლიერ აფეთქებასა და ჰაერში აფრენილ ნამსხვრევებს. აფეთქება იმ დროს მოხდა, როდესაც ერთი პირი მანქანისკენ მიდიოდა.

გამომძიებლების თქმით, „აფეთქება მოხდა ხელნაკეთი ასაფეთქებელი მოწყობილობის ამოქმედების შედეგად, რომელიც მაქსიმალური ზიანის მისაყენებლად ლითონის ნამსხვრევებით იყო სავსე“.

რუსული ოფიციალური წყაროების თანახმად, მოსკალიკი 2015 წელს, უკრაინის ჯარებსა და რუსეთის მიერ მხარდაჭერილ სეპარატისტებს შორის შეტაკებების დროს გამართულ „ნორმანდიული ფორმატის“ მოლაპარაკებებზე რუსეთის სამხედრო წარმომადგენი იყო.

რუსეთის პრეზიდენტმა ვლადიმერ პუტინმა მოსკალიკს გენერალ-ლეიტენანტის წოდება 2021 წელს მიანიჭა.

კიევმა წარსულში მსგავს თავდასხმებზე პასუხისმგებლობა აიღო, თუმცა პარასკევის თავდასხმაზე კომენტარი არ გაუკეთებია.