АКШнын Түркиядагы элчиси Том Баррак Стамбулда өткөрүлгөн Орусия-Украина согушун токтотууну көздөгөн сүйлөшүүлөрдө Түркиянын өзгөчө роль ойногондугун айтты.

«Түркиянын Орусия жана Украина менен салттуу кызматташтыгы бар, бул аларга маанилүү диалог түзүүгө мүмкүнчүлүк берет», – деди дүйшөмбү күнү түрк телеканалы NTVге берген маегинде.

Баррак Түркиянын НАТОнун негизги өнөктөшү катары кабыл алынганын, ошондой эле Орусия-Украина жаңжалындагы ортомчулугу жана Сирияда аймактык таасири кеңири экенин билдирди.

Түркиянын президенти Режеп Таййип Эрдоган менен АКШнын президенти Дональд Трамптын ортосундагы бекем мамилеге көңүл буруп, бул өнөктөштүктү мындан ары да чыңдоого жардам берүүнү көздөп жатканын айтты.

Мындан тышкары Трамптын Орусия-Украина согушу темасындагы чыдамы азайып баратканын кошумчалады.

‘Жасалма чек аралар жана ийгиликсиз саясаттар’

Сирия маселесине да токтолгон Баррак АКШнын аймактагы азыркы саясаты мурдагы ыкмалардан олуттуу түрдө айырмаланарын, анткени мурдагы саясаттар негизинен ийгиликсиз болгонун айтты.

Жакынкы Чыгыштагы учурдагы кризистердин көбү Биринчи дүйнөлүк согуштан кийин Батыштын өз кызыкчылыктарына ылайык аймакты калыптандыруу аракеттеринен келип чыкканын жактады.

«Мен муну туура же туура эмес деп айтуудан алысмын. Бирок мисалы Балфур декларациясын алалы — бул еврей калкы үчүн жаңы жана эркин мекен түзүү аракети эле. Андан кийин Сайкс-Пико келишими келип, Британия менен Франциянын бийликтери уруулар жана диний секталар толгон чөлкөмгө жасалма чек араларды чийишкен», – деди.

Баррак Осмон империясында иштеген система болгонун, бирок ал чек аралар жергиликтүү чындыктарды эске албай койгонун айтты. «Алардын айланасында жасалма чек араларды чийүү мүмкүн эмес болчу, бирок дал ошол Сайкс-Пико келишими ушуну жасаган», – деп кошумчалады.