Техастын борбордук бөлүгүндөгү суу ташкындарынан каза тапкандардын саны 51ге жетти.
Жоголгондордун арасында Camp Mystic жайкы лагеринен 27 жаш кыз бар. Керрвилл шаарынын башчысы Далтон Райс аймакта дагы жоголгондор болушу мүмкүн экенин билдирди.
“Биз бул кырдаалды эки түрдүү карап жатабыз: белгилүү жоголгондор, бул 27 адам... Экинчи жагынан так сан айта албайбыз, анткени биз билбейбиз”, - деди ал ошол эле маалымат жыйынында.
Техас губернатору Грег Эбботт маалымат жыйынында штаттын өзгөчө кырдаал жарыялоо аймагын кеңейтип жатканын жана АКШ президенти Дональд Трамптан кошумча федералдык ресурстарды сурап жатканын айтты.
Техастын Өзгөчө кырдаалдарды башкаруу департаментинин башчысы Ним Кидд аба, жер жана суу аркылуу куткаруу иштерин жүргүзүп, Гуадалупе дарыясынын узундугу боюнча жоголгондорду жана каза болгондордун денелерин издеп жатканын билдирди.
“Жоголгондордун баары табылганга чейин издөө иштерин улантабыз”, - деди ал.
Суу ташкындары жума күнү башталган, бир нече айлык жаан-чачын бир нече сааттын ичинде жаап, Гуадалупе дарыясынын деңгээли 45 мүнөттүн ичинде 26 футка (8 метрге) көтөрүлгөн.
Улуттук аба ырайы кызматы дагы жаан-чачын күтүлүп жатканын эскертип, “ашыкча суунун агып кетиши дарыялардын, жылгалардын жана башка төмөн жерлердин суу каптоосуна алып келиши мүмкүн” деп билдирди.
Ишемби күнү Керрвиллде адатта тынч агып турган Гуадалупе дарыясы тез агып, анын ылайлуу суулары ар кандай калдыктарга толгон эле.
61 жаштагы жергиликтүү тургун Герардо Мартинес: “Суу дарактардын чокусуна чейин жетти. Болжол менен 10 метрге жакын. Машиналар, бүтүндөй үйлөр дарыя менен агып кетти”, - деди.
Күтүлбөгөн суу ташкындары, жер катуу жаан-чачынды сиңире албаганда пайда болот, бул сейрек көрүнүш эмес.
Бирок окумуштуулар акыркы жылдары адамдын иш-аракетинен улам пайда болгон климаттык кризис мындай табигый кырсыктарды, анын ичинде суу ташкындарын, кургакчылыктарды жана ысык толкундарды көбүрөөк жана күчтүү кылып жатканын айтышат.
Camp Mystic лагериндеги кыйроо
Ишемби күнү шериф Лейта Керр округундагы Camp Mystic христиандык жайкы лагеринен 27 баланын дагы эле дайыны чыкпай жатканын билдирди. Лагерде 750 кыз катталган эле.
АКШнын маалымат каражаттары жоголгон кыздардын төртөө каза болгонун, алардын үй-бүлөлөрүнө шилтеме берип кабарлашты.
Гуадалупе дарыясынын жээгинде жайгашкан бул лагердин көрүнүшү баш аламан эле: жууркан, матрац, оюнчуктар жана башка буюмдар имараттардын ичинде чачылып жаткан.
Лагердин кабинасынын терезелери, сыягы, суунун күчү менен талкаланып кеткен.
Camp Mystic лагеринен бир чакырымдай алыстыкта жайгашкан Heart O' The Hills жайкы лагери ишемби күнү анын директору Жейн Рагсдейл каза болгонун ырастады.
‘Оор күн’
Керрвилл шаарынын расмий өкүлү Далтон Райс куткаруучулар “өтө оор” шарттарда иштеп жатканын айтты.
“Биз бүгүн эртең менен саат 8:00дө (1300 GMT) жерден издөө иштерин баштадык”, - деди ал, тургундарды өз алдынча издөө иштерин жүргүзбөөгө чакырып.
Райс популярдуу лагердик аймакта канча адам болушу мүмкүн экендиги белгисиз экенин кошумчалап, жоголгондордун жалпы санын айта албастыгын билдирди.
Штаттык жана жергиликтүү бийлик өкүлдөрү тургундарды дарыянын жээгиндеги лагерлерди камтыган аймакка барбоого чакырып, ондогон жолдор өтүүгө мүмкүн эместигин эскертишти.
Социалдык тармактардагы видеолордо түн ичинде жааган 12 дюймга чейин жаан-чачындан улам пайда болгон капыстан суу ташкыны үйлөрдү жана дарактарды агызганын көрсөттү. Бул Керр округунун орточо жылдык жаан-чачынынын үчтөн бир бөлүгүнө барабар.
Куткаруучулар аймак боюнча аракеттерин улантып жатканда, Керрвилл шаарынын мэри Жо Херринг коомчулукту биримдикке чакырды.
“Бүгүн оор күн болот. Адамдар муну билиши керек бүгүн оор күн болот”, - деди ал, үнү титиреп.
