Армиянын булагы жума күнү Порт-Суданга катары менен алтынчы күн дрондор менен кол салгандыгын билдирип, 2023 -  жылдын апрель айынан бери иреттүү түрдө армия менен согушкан Ыкчам колдоо күчтөрүнүн жооптуу экендигин айтты.

«Шаарлардагы айрым  буталарды аткан душман дрондорунун бир бөлүгү абадан коргонуу системаларыбыздын тоскоолдугуна учурады»,- деген булак атын билдирбөө шарты менен маалымат берди.

Күбөлөр армия колдогон өкмөт жана өлкөнүн негизги жардам борбору жайгашкан Порт-Суданда кол салуулардын болгонун кабарлашты.

Армия менен Ыкчам колдоо күчтөрүнүн арасындагы кыйратуучу кагылышуудан алыс коопсуз баш калкалоочу жер катары көрүлгөн порт шаар жекшемби күндөн бери күн сайын дрон менен жасалган кол салууларга дуушар болууда.

Негизги объектилер жабыркады

Узак аралыктан жасалган соккулар бир нече негизги объектилерди, өлкөдөгү жалгыз эл аралык аэропортту,  иштеп жаткан эң ири күйүүчү май кампасын жана шаардын башкы электр станциясын зыянга учуратты.

Суданга гуманитардык жардамдын негизги кирүү чекити болгон порт шаарына жасалган бул кол салуулар БУУнун Башкы катчысы Антонио Гутерриштин өкүлүнүн айтымында, "гуманитардык муктаждыктарды көбөйтүү жана өлкөдөгү жардам операцияларын ого бетер татаалдаштыруу коркунучун жаратат".

Эки жылды ашык убакыттан бери болуп келе жаткан кагылышууларда он миңдеген киши каза болуп,  13 миллион киши жер которду. Бириккен Улуттар Уюму бул абалды дүйнөдөгү эң оор гуманитардык кризис катары сыпаттоодо.