Өкмөттүн расмий гезитиндеги кабарга ылайык, үч айдын ичинде жалпы шайлоо өткөрүлөт деп жарыяланып, Сингапурдун парламенти шейшемби күнү таркатылды.
Бул шайлоо 2024-жылдын май айында Элдик аракеттер партиясын көпкө жетектеген Ли Сянь Лундун ордуна келген премьер-министр Лоуренс Вонг үчүн биринчи саясий сыноо болот.
Эгемендүүлүккө жетишкен 1965-жылдан бери ар бир шайлоодо үстөмдүк кылып келген Элдик аракеттер партиясы бул жолу да көпчүлүк орундарды жеңип алат деп күтүлүүдө. Бирок, 2020-жылдагы шайлоодо партиянын популярдуулугу төмөндөп, эң начар көрсөткүчтөрдүн бири катталгандыктан добуш берүү үлүшүнө жакындан байкоо салынат.
Шайлоо экономикалык оор кырдаалда өтөт. АКШнын президенти Дональд Трамптын тарифтери соодага көз каранды өлкөнүн ишмердүүлүгүнө терс таасир этүү коркунучун жаратып жатканда, дүйшөмбү күнү Сингапур 2025-жылга карата экономикалык өсүү божомолун 1-3 пайыздан 0-2 пайызга төмөндөттү.
Акыркы шайлоолордо бийликтеги партиянын популярдуулугу төмөндөп, оппозиция парламентте көбүрөөк орундарды ээлей баштады. 2011 жана 2015-жылдары оппозиция 6 орунга ээ болсо, 2020-жылы бул сан 10го жеткен.
Алдыдагы шайлоодо 2020-жылдагы шайлоого салыштырмалуу дагы төрт орун кошулат. 15и бир мүчөлүү шайлоо округдарынан жана ар бири 4 же 5 мүчөдөн турган 18 шайлоо округунан жалпысынан 97 депутат шайланат.
Февраль айында Вонг бардык сингапурлуктар үчүн жеңилдиктерди камтыган, аналитиктер «таза шайлоо бюджети» деп атаган бюджетти сунуштаган.
