Венгриянын премьер-министри Виктор Орбан Европа Биримдигинин бюджеттик жөнгө салуу эрежелерин кайра карап чыгууга чакырып, учурдагы эрежелер менен НАТОнун ички дүң продукциясынын (ИДП) 5 пайызын коргонуу чыгымдарына бөлүү максатына эч бир мүчө мамлекеттин жете албай турганын эскертти.

Гаагада НАТОнун лидерлеринин жыйынынын алдында сүйлөгөн сөзүндө Орбан, 5 пайыздык максатка жетүү мүмкүн экенин, бирок бул оңой болбой турганын айтты.

Журналисттерге: «Бул оңой иш эмес, бирок Евробиримдиктин бюджетин жөнгө салуу эсептөөлөрү толугу менен өзгөртүлүшү керек», - деген Орбан “Эгерде биз эрежелерди азыркыдай калтырсак, Европа Биримдигинде эч ким 5 пайыздык максатты аткара албайт. Ошондуктан баарын башкача ыкма менен кайра эсептешибиз керек”,-деп билдирди.

Экономикалык коркунуч

Орбан бүгүнкү күндө Европанын алдында турган эң чоң коркунучтун аскердик эмес, экономикалык экенин, чыныгы коркунучтун коопсуздук жагынан эмес, экономикалык жана глобалдык соодада атаандаштыкка жөндөмдүүлүгүн жоготууга байланыштуу экенин айтты.

“Менимче Орусия бизге чыныгы коркунуч жарата тургандай күчтүү эмес. Биз андан алда канча күчтүүбүз”, - деп кошумчалады. Украина тууралуу болсо: “НАТОнун Украинада эч кандай иши жок. Украина да, Орусия да НАТОнун мүчөсү эмес. Менин милдетим да мунун ушундай бойдон калышын камсыз кылуу”,-деди.