Италиянын коргонуу гиганты Леонардонун башчысы Стефано Понтекорво жакында берген интервьюсунда түрк коргонуу фирмасы Байкар менен түзгөн биргелешкен ишкананын негизинде учкучсуз учуучу аппарат системаларында алдыңкы орунга чыгууну максат кылгандарын айтты.

Понтекорво Париж-Ле Бурже аэропортунда өткөрүлгөн 55-Париж авиация көргөзмөсүндө TRT World телеканалына берген маегинде: «Байкар тарабынан тандалганыбыз үчүн абдан сыймыктанабыз... Байкарды биз да тандадык. Байкар чоң фирма, балким дүйнөнүн эң мыктысы» деди.

Эки компаниянын ортосунда 50-50 % өнөктөштүк катары түзүлгөн LBA Systems, учкучсуз учуучу аппараттарды долбоорлоо, өнүктүрүү, өндүрүү жана тейлөөнү колго алат.

"Биз бул өнөктөштүккө ушунчалык берилгендиктен тарыхыбызда биринчи жолу башка компания менен биргелешкен стенд ачтык жана ал компания Байкар" деди Понтекорво.

“Дрон тармагында алдыңкы компания болууну көздөп жатабыз жана бул пайдубалды Байкар менен бирге курабыз. Европанын жана дүйнөлүк рыноктор үчүн өзгөчө өнүмдү чыгарабыз” деп кошумчалады.

Понтекорво биргелешкен ишканада Акынжы TB3 жана TB2 менен бирге Леонардонун өз учкучсуз учуучу аппараттары да алдыңкы орунда боло турганын айтты.

Биргелешкен ишкананын туруктуу платформага ээ болорун жана Леонардонун бул жаатта "максималдуу салым кошо турганын" белгилеген Понтекорво, "Биз көптөгөн түрк компаниялары менен иштешебиз жана Байкар менен иштешкенибизге абдан сыймыктанабыз. Байкар биз сыяктуу технологияга, изилдөөгө жана өнүктүрүүгө абдан кызыккан компания. Ошондуктан биргелешип чоң иштерди жасай алабыз жана бул Европанын коргонуусуна абдан маанилүү салым кошот", - деди.

“Технология өтө тез өнүгүп жатат, ошондуктан биз бул үч-төрт дрон менен ишти баштоо үчүн туруктуу платформанын негизинде жолго чыктык,” - деп кошумчалады.