Улуу Британия кеминде 12 ядролук куралга жөндөмдүү F-35A аскердик учактарын сатып алууну жана НАТОнун абадагы ядролук миссиясына кошулууну пландаштырууда.

Премьер-министр Кейр Стармер шаршемби күнү Нидерландияда өтүүчү НАТОнун саммитинде бул тууралуу билдирүү жасап, мүчө мамлекеттерди альянска берилгендигин күчөтүүгө чакырат. Бул тууралуу маалымат расмий пресс - жыйында билдирилди.

F-35A учактары кадимки куралдарды алып жүрүүгө жөндөмдүү болуу менен бирге зарыл болгон учурда АКШда жасалган ядролук бомбалар менен да жабдыла алат.

Бешинчи муундагы бул аскердик учак негизинен АКШнын Lockheed Martin компаниясы тарабынан өндүрүлөт жана дүйнөдөгү эң өнүккөн учактардын катарына кирет, бирок ошол эле учурда эң кымбат учак катары да билинүүдө.

“Белгисиздик күчөп турган мезгилде тынчтык өзүнөн өзү сакталат деп ишенүүгө болбойт, ошондуктан менин өкмөтүм улуттук коопсуздукка инвестиция салып жатат”, - деди Стармер.

Downing Street бул кадамды “Улуу Британиянын ядролук позициясында бир муундун ичиндеги эң чоң күчөтүү” деп мүнөздөдү.

“Улуу Британиянын НАТОго болгон милдеттенмеси талашсыз, ошондой эле альянстын Улуу Британияны коопсуз сактоого кошкон салымы да талашсыз”, - деди Стармер.

“Бирок биз баарыбыз Евро-Атлантика аймагын келечек муундар үчүн коргоо үчүн аракет кылышыбыз керек.”

Стармер бул чечимдин 100 ишкананы колдоп, өлкө боюнча 20 000 жумуш орунун камсыз кыла турганын белгилеп:“Дүйнөлүк деңгээлдеги Королдук аба күчтөрү үчүн жаңы доорду” баштай турганын айтты.

НАТОнун башкы катчысы Марк Рютте бул жарыяны “НАТОго Улуу Британиянын дагы бир күчтүү салымы” деп мүнөздөдү.