Тышкы иштер министри Хакан Фидан Түркиянын Сирияда Израиль баш болгон эч бир өлкө менен кагылышуу ниети жок экенин билдирди.

Фидан шаршемби күнү CNN Turk телеканалында түз эфирде сүйлөгөн сөзүндө маанилүү темаларга токтолуп, суроолорго жооп берди.

Сириянын көз карандысыз мамлекет экенин баса белгилеп: «Түркия катары Сирияда эч бир өлкө менен кагылышуу ниетибиз жок»,-деди.

“Израилдин аймактагы экспансионисттик амбицияларын пайдаланып, Сирияны провокациялоого аракет кылып жатканы кабыл алынгыс”, – деп кошумчалады.

Министр Фидан Түркиянын аймактагы эч бир өлкө менен кагылышууну каалабаганын айтып, бирок эгерде Сирияда ички баш аламандыктар, операциялар же Түркиянын улуттук коопсуздугуна коркунуч жарата турган чагымчылыктар кайталанса, Анкаранын четте карап тура албай турганын эскертти.

Фидан ошондой эле Асад режими кулатылгандан кийин Израилдин Сириянын аскердик инфраструктурасын талкалаганын сынга алып, Тель-Авивдин Сириянын жаңы администрациясына жана куралдуу күчтөрүнө «эч нерсе калтырбоо» стратегиясын иштеп чыкканын жана бул кадамды алга жылдырып жатканын айтты.

“Бизге кол салбаган эч бир өлкөгө ачык кол салбайбыз. Коңшу өлкөдө бизге зыян келтире турган туруксуздуктун аянты пайда болсо, ага кайдыгер карай албайбыз. Буга байланыштуу биринчи кезекте дипломатиялык кадамдарды таштайбыз”, – деп кошумчалады.

Израилдин премьер-министри Биньямин Нетаньяхунун АКШга сапары тууралуу суроого жооп берип жатып Фидан: “АКШ Нетаньяхуга чек коюп, алкагын түзүшү керек”, – деди.

Хакан Фидан Түркиянын президенти Режеп Таййип Эрдогандын АКШнын президенти Дональд Трамп менен болгон мамилеси жөнүндөгү суроого болсо: “Трамп биздин президентти лидер катары сыйлайт жана анын менен жакшы мамиледе”, – деп жооп берди.

Эрдоган менен Трамптын жолугушуусу качан болот деген суроого да эки лидердин тең мүмкүн болушунча тезирээк жолугушууга даяр экенин айтты.

Ал эми АКШнын мамлекеттик катчысы Марко Рубио менен жолугушууда кандай маселелер талкууланды деген суроого Фидан, Сириянын Израиль тарабынан бомбаланышынын тез арада токтотулушу сыяктуу көптөгөн теманы сүйлөшкөндөрүн билдирди.