АКШнын президенти Дональд Трамптын администрациясы Мамлекеттик департаменттин бюджетин дээрлик жарымына кыскартууну пландап жатканын жергиликтүү маалымат каражаттары жазып чыгышты.

Дүйшөмбү күнү Вашингтон Пост гезити тарабынан биринчи жолу жарыяланган маалыматка караганда, 2026-каржы жылга карата сунушталган бюджет АКШнын Мамлекеттик департаменти жана Эл аралык өнүктүрүү агенттигине (USAID) 28,4 миллиард доллар бөлүүнү көздөйт. Бул сан Конгресс тарабынан 2025-жылга карата бекитилген бюджеттен 27 миллиард долларга аз.

Маалыматка ылайык, гуманитардык жардам 54 пайызга, ал эми глобалдык саламаттыкты сактоо боюнча каржылоо 55 пайызга кыскартылмакчы.

НАТО жана БУУ баш болгон 20 эл аралык уюмга колдоо толугу менен токтотулуп, бирок Эл аралык атомдук энергия агенттиги жана Эл аралык жарандык авиация уюму сыяктуу айрым уюмдарга максаттуу салымдар улантылат.

Кыскартуулар күчүнө кириши үчүн Конгресстин макулдугу керек. Бирок бул кыскартуулар Конгрессте, анын ичинде республикачыл мыйзам чыгаруучулардын каршылыгына дуушар болушу мүмкүн.

Ири кыскартуулар

Бул талкуулар Трамптын администрациясы жана миллиардер Илон Масктын Өкмөттүн натыйжалуулугун жогорулатуу департаменти федералдык өкмөттү тез жана ири масштабда кыскартууну, миллиарддаган доллар чыгымдарды азайтууну жана миңдеген кызматкерлерди жумуштан бошотууну көздөп жаткан учурда жүрүп жатат.

Трамп өзүнүн биринчи мөөнөтүндө АКШнын дипломатиялык жана жардам бюджетинин үчтөн бир бөлүгүн кыскартууну сунуштаган. Бирок АКШнын федералдык өкмөтүнүн бюджетин аныктаган Конгресс Трамптын сунушуна каршы чыккан.

Маалыматтарга караганда, башка сунуштардын арасында чет өлкөгө жардамдын төрттөн бир бөлүгүнөн ашыгын жоюу, ВИЧке байланыштуу чакан суммаларды кошпогондо глобалдык саламаттыкты сактоо каржылоону токтотуу, БУУну каржылоону токтотуу, Ооган союздаштарына жардам берген негизги кеңсени жоюу жана бир катар качкындар менен миграция программаларын кыскартуу кирет.