АКШнын президенти Дональд Трамп Иранга каршы аскердик соккуларды улантууну көздөбөйт жана анын ордуна Тегеран менен тынчтык келишимине жетишүүнү каалайт. Бул тууралуу Axios маалымат сайты аты аталбаган америкалык аткаминерге шилтеме берүү менен билдирди.

Маалыматка ылайык, Трамп Ирандын ядролук объектилерине чабуулдардан кийин Израилдин премьер-министри Биньямин Нетаньяху менен байланышып, кол салуулардын жыйынтыктары тууралуу маалымат берди жана Иран менен келишим түзүү ниетин айтты.

«Президент соккуларды улантууну каалабайт. Эгерде Иран жооп кайтарса чара көрүүгө даяр, бирок Нетаньяхуга тынчтыкты каалаганын айтты», – деп америкалык расмий өкүл билдирген.

Израилдик бир расмий өкүл да бул позицияны тастыктап Axiosко: «Америкалыктар бизге бул раунду жабууну каалашкандарын ачык айтышты, кол салууларыбызды улантуубузга каршы эмес, бирок алар үчүн бул тема жабык», – деди.

Маалыматта Израилдин АКШнын талабы менен Американын чабуулунан 48 саат мурда Ирандын абадан коргонуу системаларын жок кылганы белгиленди. Америкалык жана израилдик расмий өкүлдөрдүн айтымында, Вашингтон Израилге Фордо өзөктүк объектисине кол салуу алдында сокку урула турчу буталардын тизмесин берген.

АКШ Фордого сокку уруу үчүн B-2 жашыруун бомбалоочу учактары менен бункерлерди талкалоочу бомбаларды колдонгон. Ошондой эле, америкалык суу астындагы кемелерден ондогон круиздик ракеталар Натанз жана Исфахан шаарларындагы объектилерге атылган.

АКШнын Бириккен штаб башчыларынын төрагасы генерал Дэн Кейндин айтымында, операцияга 125тен ашуун америкалык учак, анын ичинде стелс-бомбалоочу учактар, согуштук учактар, күйүүчү май куюучу учактар, суу астындагы кеме жана байкоочу учактар катышкан. Трамп бул соккуларды «өтө ийгиликтүү» деп мүнөздөгөн.

Бул чыңалуу 13-июнда Израилдин Ирандагы аскердик жана ядролук объектилерге абадан сокку уруусунан кийин башталган. Тегеран бул чабуулга ракеталык соккулар менен жооп кайтарган.

Ирандын Саламаттыкты сактоо министрлиги Израилге каршы согушта 430 киши каза болуп, 3500дөн ашуун адам жаракат алганын билдирген. Ал эми Тель-Авив Ирандын ракета жана дрон чабуулдарынан 25 киши каза болуп, жүздөгөн адамдар жаракат алганын маалымдаган.