Украинанын президенти Владимир Зеленский Киевдин дрондорду жана ракеталарды өндүрүүнү көбөйтүп жатканын жана Россиянын чабуулдарына "симметриялуу" жооп берерин билдирди.

«Күн тартибибизде кыймылдарыбызды пландоо, орус кол салууларына каршы жооп берүү даярдыгы жана алдын алуучу чаралардын көрүлүшү бар»,- деген Зеленский шейшемби күнү  жогорку мартабалуу аскердик жетекчилер менен өткөргөн кеңейтилген жыйындан кийин жасаган билдирүүсүндө Украинанын жергликтүү учкучсуз учуучу аппараты жана алыскы аралыкка учуу мүмкүнчүлүктөрүн кеңейте тургандыгын баса белгиледи.

Зеленский Европа өлкөлөрү менен жаңы келишимдердин даярдалып жатканын жана бул келишимдер өзгөчө пилотсуз системаларды жана алыскы аралыкка атуучу куралдарды чыгаруу үчүн Украинадагы өндүрүшкө инвестиция тартууну максат кылганын айтты.

"Биздин көз карашыбыз – Россиядан келген бардык коркунучтарга симметриялуу жооп кайтаруу. Россиядагылар Украинага каршы жасаган иштеринин кесепеттерин сезиши керек. Жана сезишет", - деди Зеленский.

 Россия Украинанын дрондорун атып түшүрдү

Россиянын Коргоо министрлиги шаршемби күнү эрте менен жасаган билдирүүсүндө үч сааттык убакыттын ичинде көпчүлүгү ортоңку жана түштүк аймактарда болгон  112 Украина дронунун жардырылгандыгын же таасирсиз абалга келтирилгендигин билдирди.

Москва шаарынын мэри Сергей Собянин Украинанын алты  дронун  Россиянын борборуна багыт алган учурда атып түшүрүлгөнүн билдирди. Куткаруу топторунун  жердеги сыныктарды иликтеп жатканы айтылды.

Россия өзгөчө акыркы күндөрү Украинага жасалган абадан кол салуулардын өз жарандарына карата күч алган Украина дрондорунун кол салуларына «жооп» экендигин белгиледи жана  Киевди тынчтык аракеттерине "тоскоолдук кылууга" аракет кылуу менен  айыптады.

Киев жана батыштык өнөктөштөрдүн 30 күндүк шартсыз ок атышпоо сунуштарын четке каккан Москва жума күнү  кечинде баштап дүйшөмбү күнү эртең мененге чейин жүздөгөн дрондор менен Украинаны бутага алды.