Петмина граѓани се убиени во градот Прилука на северот од Украина во напад со руски беспилотни летала во кој се оштетени станбени згради во вториот по големина украински град, Харков, каде што 19 лица се повредени, објавија регионалните гувернери утрово.

Во апликацијата за пораки Телеграм, градоначалникот на Харков, Игор Терехов, изјави дека нападите, кои се случиле околу еден часот утрово, оштетиле седум станбени згради.

Терехов изјави дека еден дрон погодил 17. кат од една зграда и втор кат од друга.

Службите за итни случаи објавија дека меѓу повредените во Харков има најмалку четири деца.

Во градот Прилука, едногодишно дете и две жени се меѓу загинатите, изјави регионалниот гувернер на Чернигов, Вјачеслав Чаус, на Телеграм, а првичните детали покажуваат дека уште шест лица се повредени и хоспитализирани.

Најмалку шест беспилотни летала се користени во ноќниот напад во кој се оштетени згради во станбената зона на градот, изјави Чаус.

Руски дрон во Прилука ја погодил куќата на началникот на противпожарната служба, при што загина неговото семејство, објави министерот за внатрешни работи на Украина, Игор Клименко, на Телеграм.

Според министерот, загинале сопругата на началникот на противпожарната служба, неговата ќерка и нејзиниот едногодишен син.

Началникот на противпожарната служба бил на местото на руските напади заедно со противпожарната и спасувачката екипа.