Грција има намера да потроши 25 милијарди евра како дел од повеќегодишниот план за одбрана, изјави денеска во парламентот грчкиот премиер Киријакос Мицотакис.

Овој потег е дел од напорите на Грција да ги модернизира своите вооружени сили додека излегува од должничката криза 2009-2018 година, што доведе до долгогодишно штедење и додека се обидува да остане во чекор со својот историски ривал Туркије, објави Ројтерс.

Официјални лица информирани за планот рекоа дека тој ќе трае до 2036 година и ќе вклучува купување на нови подморници, нови авиони, поморски и подводни дронови, како и комуникациски сателит.

Дел од парите ќе бидат наменети за развој на систем за противвоздушна и заштита од беспилотни летала, наречен „Ахиловиот штит“.

Миткотакис им рече на пратениците дека планот значи дека Грција инвестира во нејзиниот суверенитет, но предупреди дека земјата ќе мора да обезбеди фискална претпазливост и покрај плановите на ЕУ да ги зголеми инвестициите во одбраната.

Тој изјави дека не може да има напредок без безбедност, пренесе Катимерини.

„Претставуваме сеопфатен план за најдрастичната трансформација на вооружените сили во модерната историја на земјата“, рече Микотакис.

Според него, Грција има стратешки договори со Соединетите Американски Држави и Франција, сојузи кои даваат безбедносни гаранции во неизвесна меѓународна средина.

„Одбраната се јавува и како столб на просперитетот“, нагласи Микотакис.

Грција, членка на Европската унија и НАТО, веќе троши околу три отсто од бруто домашниот производ за одбрана.

Тоа е речиси двојно повеќе од просекот во ЕУ, која е под притисок да ја зајакне својата одбрана за да ги надмине тензиите во нејзиниот 75-годишен сојуз со САД.