Американскиот претседател Доналд Трамп денеска изрази надеж дека Индија и Пакистан можат веднаш да ги запрат тековните прекугранични борби.

„Толку е ужасно. Ги познавам двете страни многу добро и сакам да ги видам како го решаваат тоа. Сакам да ги видам како запираат и се надевам дека сега можат да престанат. Тие возвратија око за око, па се надевам дека сега можат да престанат. Ако можам да направам нешто за да помогнам, ќе бидам таму “додаде тој.

Индија ја објави „Операцијата Синдор“ вчеравечер, велејќи дека погодила „терористичка инфраструктура“ на девет локации во Пакистан. Пакистанската војска соопшти дека 31 лице е убиено во нападите.

Ескалацијата меѓу соседите со нуклеарно оружје се случи по нападот на 22 април во Пахалгам, Кашмир под индиска администрација, во кој беа убиени 26 лица.

Индија го обвини Пакистан за нападот. Пакистан негираше вмешаност и повика на неутрална истрага.

Индиските власти изјавија дека Њу Делхи го искористил своето право да одговори и да спречи, како и да одврати повеќе вакви прекугранични напади.

Пакистан соопшти дека соборил пет индиски авиони и вети дека ќе возврати. Немаше непосреден одговор од Индија.