Украинската страна им предлага на Русите прекин на огнот до средбата на шефовите на двете земји каде што би се дискутирало за крајот на војната, изјави денес претседателот на Украина, Володимир Зеленски, за време на денешното обраќање до медиумите.

„Русите не се подготвени за прекин на огнот. Ова ниво на делегација не може да го реши тоа, тие го сметаат за прашање на лидерите. Тие самите рекоа дека прашањето за прекин на огнот е прашање на повисоко ниво. Ние сме подготвени за состанок веднаш. Местото на состанокот нека го изберат Русите - Истанбул, Ватикан, Швајцарија, сè е достапно. Во понеделник или кој било друг ден“, рече Зеленски, пренесува Укринформ.

Вториот круг преговори меѓу Русија и Украина се одржа во Истанбул во понеделник, а состанокот траеше повеќе од еден час во палатата Чираган.

По состанокот, Украина објави дека е постигнат договор за размена на сите тешко ранети и критично болни воени заробеници, како и млади војници на возраст од 18 до 25 години, по принципот „сите за сите“, и дека двете страни се согласиле да ги разменат телата на 6.000 паднати војници.

Киев, исто така, предложи состанок на ниво на лидерите на двете земји до крајот на месецот.