Европската унија очекува дека трговските политики на американскиот претседател Доналд Трамп би можеле да го зголемат обемот на царинските давачки за стоки од ЕУ на вкупна вредност од 549 милијарди евра, што би влијаело на речиси целиот европски извоз во САД, предупреди денес европскиот комесар за трговија Марош Шефчовиќ.

Зборувајќи пред членовите на Европскиот парламент, Шефчовиќ процени дека новата рунда американски царини, која вклучува увоз на фармацевтски производи, полупроводници, дрва, критични минерали и камиони, би можела да влијае на дополнителни 170 милијарди евра европски извоз.

Ова би значело дека дури 97 проценти од вкупниот извоз од Европската Унија во Соединетите Американски Држави би бил опфатен со трговски мерки, објавува „Блумберг“.

„Овие увозни даноци се неосновани и предизвикуваат економска штета од двете страни на Атлантикот“, рече Шефчовиќ, додавајќи дека Европската Унија не може да биде пасивна во ситуација што ја опиша како „неприфатлива“.

Шефчовиќ рече дека договореното решение со САД останува јасен и претпочитан исход на ЕУ.

„Сега ни треба САД да ја покажат својата подготвеност да постигнат напредок кон фер и избалансирано решение“, рече тој на дебата во Европскиот парламент.

Шефковиќ рече дека Европската Унија ќе ја искористи паузата до 8 јули за да подготви понатамошни мерки за ребалансирање и да обезбеди еднакви услови доколку разговорите не успеат.

Сепак, според министерот, Европската Унија не се чувствува под прекумерен притисок да прифати нефер трговски договор со САД, додавајќи дека другите трговски партнери се многу заинтересирани да ги забрзаат разговорите со блокот.

„Не се чувствуваме слаби. Не се чувствуваме под прекумерен притисок да прифатиме договор што не би бил фер за нас. Можам да ви кажам дека нашите телефони не престануваат да ѕвонат постојано затоа што сите сакаат да ги забрзаат преговорите за договор за слободна трговија со нас“, продолжи тој.

Европската Унија ѝ предлага на администрацијата на Трамп, меѓу другото, намалување на царинските и нецаринските бариери, зголемување на европските инвестиции во САД, соработка во борбата против нелојалната конкуренција и зголемено купување на американска стока.

Доколку преговорите не завршат успешно, ЕУ најави одмазднички мерки, вклучително и повторно активирање на царините за американски стоки во вредност од 21 милијарда евра кои претходно беа суспендирани како гест на добра волја, но ќе бидат преземени понатамошни чекори.